Тошкентда автобус ва метро йўлкираси 47 фоизга ошади

Жорий йилнинг 1 октябрь санасидан пойтахтда автобус ва метрода электрон тўлов орқали бир марталик йўл ҳақи 1 700 сўмдан 2 500 сўмга кўтарилади, нақд пулдаги тўлов эса 3 000 сўмлигича қолади. Бу ҳақда Халқ депутатлари Тошкент шаҳар Кенгашининг “Тошкент шаҳридаги жамоат транспортида йўлкира ҳақи тарифини белгилаш тўғрисида”ги қарорида белгиланган.

Қарорга мувофиқ, электрон тўлов орқали амалга ошириладиган бир марталик қатнов нархи қарийб 47 фоизга ошади. Транспорт картасидан фойдаланган йўловчилар учун эса бир соат ичида бошқа йўналишга ўтишда имтиёзли тарифлар сақланади.

Жумладан, йўловчи автобусда йўл ҳақини тўлаб, бир соат ичида бошқа автобусга ўтса, иккинчи қатнов учун 1 500 сўм тўлайди. Учинчи ва ундан кейинги автобусларда эса йўловчи ушбу вақт оралиғида бепул ҳаракатланиши мумкин.

Автобус ва метродан биргаликда фойдаланилганда ҳам имтиёзли тарифлар амал қилади. Бунда метрога кириш учун биринчи қатновда 2 500 сўм, кейинги транспорт алмашинувида эса белгиланган тариф бўйича 1 500 сўмдан тўланади. Имтиёз метрода фақат бир соат ичида бир марта амал қилади. Метрога иккинчи марта кирилганда 60 дақиқалик ҳисоб янгидан бошланади.

Шунингдек, транспорт карталари учун қатновлар сонига боғлиқ тарифлар ҳам белгиланган. Унга кўра, фақат автобусдан фойдаланиш учун бир кунлик тариф 11 500 сўм, 30 кунлик тариф эса 250 минг сўмни ташкил этади. Автобус ва метрода биргаликда фойдаланиш учун кунлик тариф 13 500 сўм, 30 кунлик тариф 345 минг сўм этиб белгиланган.

Бундан ташқари, йўловчилар учун 10, 20 ва 30 марталик сафар пакетлари ҳам мавжуд бўлади. Уларнинг нархи мос равишда 19 минг, 38 минг 500 ва 57 минг 500 сўмни ташкил этади.

Қарорда ўқувчилар, талабалар, нафақахўрлар ҳамда ногиронлиги бўлган шахслар учун транспорт карталарининг тариф режаларини харид қилишда белгиланган нархларга нисбатан 50 фоиз чегирма қўлланиши ҳам назарда тутилган. Янги тарифлар жорий йилнинг 1 октябридан кучга киради.

Эслатиб ўтамиз, аввалроқ пойтахт ҳокимлигининг “Тошкент шаҳридаги жамоат транспортида йўлкира ҳақи тарифини белгилаш тўғрисида”ги қарори лойиҳаси доирасида жорий йил 1 октябрдан бошлаб Тошкент шаҳрида метро ва автобус учун йўлкира 1 700 сўмдан 2 500 сўмга оширилиши мумкинлиги ҳақида хабар берилган эди. Транспорт вазирлиги мазкур тариф ўзгариши бўйича якуний қарор ҳали қабул қилинмаганини, йўл ҳақининг эҳтимолий оширилиши ташувчиларга қўйиладиган хизмат сифати талаблари билан биргаликда кўриб чиқилиши лозимлигини маълум қилганди.