Стэнфорддаги Фаластин тарафдори намойишчиларига қўйилган айбловлар бекор қилинади

Стэнфорд университетининг собиқ ва амалдаги 5 нафар талабасига 2024 йилдаги Фаластин тарафдорлиги намойиши билан боғлиқ қўйилган айбловлар бекор қилинади. Бу ҳақда Калифорния Бош прокурори Роб Бонта маълум қилди.

Роб Бонта идораси кеча, 21 сентябрь куни 5 нафар судланувчи ҳар бири 100 соатдан жамоат ишларини бажарса ва университетга жами қарийб 52 минг доллар товон тўласа, уларга қўйилган айбловларни бекор қилишини билдирган.

Санта-Клара округи давлат ҳимоячиси ўринбосари Ави Сингх, судланувчилардан бирини ҳимоя қилган адвокат, барча айбланувчилар “тўлиқ товон тўлагани ва ҳаётларини давом эттиришлари учун катта ҳажмда жамоат ишларини бажаришга рози бўлгани”ни айтган. 

Февраль ойида суд ҳайъати бир қарорга кела олмаганидан сўнг, судья ушбу иш бўйича жараённи якунланмаган деб эълон қилган эди. Дастлаб 12 нафар намойишчига оғир жиноят сифатида баҳоланадиган вандализм айблови қўйилган, улардан 7 нафари аввалроқ айбини тан олиш бўйича келишувлар ёки муқобил дастурларни қабул қилган.

Прокурорлар айбловлар қўйилган пайтда гумондорлардан камида бири бинога деразани синдириб кирганини айтган. Полиция 2024 йил 5 июнь куни воқеага алоқадор 13 кишини ҳибсга олган, университет эса бино “кенг кўламда” зарар кўрганини билдирган.

Мазкур айбловлар АҚШ коллежларида 2024 йилда ўтказилган Фаластин тарафдори намойишлар ҳаракати иштирокчиларига нисбатан қўйилган энг жиддий айбловлардан бири бўлган. Намойишчилар Исроилнинг Ғазога ҳужум ва зарбаларини, Вашингтоннинг ўз иттифоқчисини қўллаб-қувватлашини тўхтатишни, шунингдек, университетларнинг Исроилни қўллаб-қувватловчи компаниялардан маблағларини чиқаришини талаб қилган.

Намойишчилар университет президентининг биносини фаластинлик шифокор Аднан ал-Бурш шарафига “Доктор Аднан офиси” деб қайта номлаган. Ал-Бурш бир неча ой қамоқда сақланганидан сўнг Исроил қамоқхонасида вафот этган эди.

Оммавий ахборот воситалари ҳисоб-китобларига кўра, 2024 йилда АҚШда ўтказилган Фаластин тарафдори намойишлар ҳаракати давомида 3 мингдан ортиқ киши ҳибсга олинган. Айрим талабалар ўқишдан четлатилган, университетдан ҳайдалган ва ҳатто дипломларидан маҳрум қилинган.

Суд жараёни якунланмаган деб эълон қилинганидан кейин Санта-Клара округи прокурори Жефф Розен иш бўйича янги суд жараёни ўтказилишини талаб қилишини айтган. Бироқ ҳимоя адвокатлари Розеннинг аввалги баёнотлари ва бошқа ҳолатларни келтириб, унинг идораси ишни кўриб чиқишдан четлаштирилиши кераклигини муваффақиятли асослаган. Шундан сўнг ишни Калифорния Бош прокурори идораси ўз назоратига олган.

Эслатиб ўтамиз, аввалроқ АҚШ федерал судьяси Дональд Трамп маъмурияти фаластинпарвар фаоллиги ва Исроилни танқид қилган хорижлик талабаларнинг визаларини бекор қилиш ҳамда уларни депортация қилиш учун қўллаган қонун нормаларини Конституцияга зид деб топганди.