“Сити” Энцо Фернандес учун 164 млн евро таклиф қилмоқчи

“Манчестер Сити” трансфер ойнасининг сўнгги кунларида Энцо Фернандес учун “Челси”га йирик таклиф билан чиқишга тайёрланмоқда. Бу ҳақда журналист Гастон Эдул маълум қилди.

Аргентиналик журналистнинг маълум қилишича, “Манчестер Сити” 25 ёшли ярим ҳимоячи учун 130–140 миллион фунт стерлинг таклиф қилишни режалаштирмоқда. Бу ҳозирги курс бўйича тахминан 152–164 миллион еврони ташкил қилади.

Аввалроқ инсайдер Фабрицио Романо ҳам “Сити” трансфер ойнаси ёпилгунига қадар Фернандес учун расмий таклиф билан чиқишни режалаштираётганини хабар қилган эди. 

Аргентиналик футболчи ҳам трансферга йўл очгани айтилмоқда. “Челси” эса Фернандесни фақат молиявий жиҳатдан қулай таклиф тушган тақдирдагина сотишни кўриб чиқиши мумкин. Лондон клуби футболчининг трансферини тахминан 120 миллион фунт стерлингга баҳолаётгани хабар қилинган.

Маълумот учун, Фернандеснинг “Челси” билан шартномаси 2032 йил июнь ойига қадар амал қилади. “Transfermarkt” эса аргентиналик футболчининг айни пайтдаги бозор қийматини 90 миллион евро деб баҳоламоқда.