Шавкат Мирзиёев Хитой ва Непал раҳбарларига ҳамдардлик билдирди (видео)

Бугун, 27 август Ўзбекистон Республикаси Президенти Шавкат Мирзиёев Хитойнинг Тибет автоном районидаги Шигадзе шаҳар округида ва Непалнинг Тибет билан чегарасида юз берган кенг кўламли кўчки ва тошқин оқибатида кўплаб инсонлар ҳалок бўлгани, жароҳатлангани ҳамда катта иқтисодий талафот кўрилгани муносабати билан Хитой Халқ Республикаси Раиси Си Цзиньпин ва Непал Президенти Рам Чандра Пауделга ҳамдардлик йўллади. Бу ҳақда Президент матбуот котиби маълум қилди.

Қайд этилишича, давлат раҳбари вафот этганларнинг оила аъзолари ва яқинларига сабр-тоқат, жароҳат олганлар тез фурсатда соғайиб кетишини тилаган.

Эслатиб ўтамиз, Непал ва Тибетда кеча, 26 август куни юз берган ҳалокатли сув тошқинлари оқибатида 1,5 мингга яқин киши, жумладан, 700 дан ортиқ хорижлик бедарак йўқолгани ҳақида хабар берилганди. Ҳодиса оқибатида камида 165 киши ҳалок бўлган. Маҳаллий ҳокимият қурбонлар сони яна ортиши мумкинлигини билдирган. Ҳалок бўлганлар ва жабрланганлар орасида Ўзбекистон фуқаролари йўқ.

Мамлакатда 826 киши, жумладан, 500 га яқин хорижликнинг қаердалиги номаълумлигича қолмоқда. Бедарак йўқолганлар орасида Ҳиндистоннинг 177, АҚШнинг 63, Австралиянинг 34, Буюк Британиянинг 33 ва Канаданинг 25 нафар фуқароси бор.