Сербияда 150 минг киши Вучичнинг истеъфосини талаб қилиб, кўчага чиқди (видео)

Сербия пойтахти Белградда муддатидан олдинги парламент сайловлари арафасида Президент Александр Вучич ҳокимиятига қарши 150 мингга яқин киши намойишга чиқди. Бу ҳақда DW хабар берди.

Намойиш кеча, 22 октябрь куни Белградда бўлиб ўтган. Маълумотларга кўра, унда қатнашганлар Вучичнинг ҳокимиятдан кетишини ва сайловда “Талабалар рўйхати” ҳаракатини қўллаб-қувватлашни талаб қилган.

Сербияда жорий йилнинг 25 октябрь куни бўлиб ўтадиган муддатидан олдинги парламент сайловлари қарийб икки йилдан бери давом этаётган норозилик намойишлари фонида ўтказилмоқда. 2024 йилнинг ноябрь ойида Нови-Сад шаҳридаги темирйўл вокзалида таъмирдан чиққан соябон конструкцияси қулаб тушиб, 16 киши ҳалок бўлган эди. Мустақил ОАВ ва мухолифат фожиага коррупция сабаб бўлганини таъкидлаган. Шундан сўнг мамлакатда кенг кўламли норозилик намойишлари бошланган, уларнинг асосий ҳаракатлантирувчи кучи талабалар бўлган.

Намойишлар давомида шаклланган “Талабалар рўйхати” ҳаракати сайловда олимлар, фаоллар ва жамоат арбобларини номзод сифатида илгари сурмоқчи. Ҳаракатнинг аниқ етакчиси йўқ. Сербиядаги кўплаб мухолиф партиялар эса сайлов пойгасидан чиқиб, сайловчиларни талабаларни қўллаб-қувватлашга чақирган.

20 октябрь куни эълон қилинган сўров натижаларига кўра, “Янги серб сиёсий тафаккури” лойиҳаси доирасида ўтказилган тадқиқотда респондентларнинг 44,5 фоизи “Талабалар рўйхати”ни, 42,7 фоизи эса Вучич бошчилигидаги Сербия тараққийпарвар партиясини қўллаб-қувватлашини билдирган. Бу натижалар сўровда қатнашганлар фикрини акс эттиради ва сайлов якунини олдиндан белгиламайди.

Маълумот учун, Вучич 2014 йилдан буён Сербия сиёсатида етакчи ўрин тутиб келади. У президентликдан кетиши ҳақида аввал ҳам баёнот берган, бироқ 25 октябрдаги сайловда бош вазир лавозимига даъвогарлик қилмоқчи. Сербия Конституциясига кўра, бош вазир президентга қараганда кенгроқ ваколатларга эга. Вучич 2014–2017 йилларда ҳам бош вазир бўлган, кейинчалик президент этиб сайланган.

Эслатиб ўтамиз, аввалроқ Франция Президенти Эммануэль Макрон мамлакатда тартибсизликлар келтириб чиқариши мумкин бўлган ноқонуний намойишлар тақиқланишини билдиргани ҳақида хабар берилган эди.