Саудия муфтийси ҳусийларга қарши кескин баёнот эълон қилди

Саудия Арабистонининг Бош диний уламоси мамлакат ҳарбийларини Эрон қўллаб-қувватлаётган ҳусийларга қарши жангда жонини фидо қилишга тайёр туришга чақирди. Бу ҳақда Саудия давлат ахборот агентлиги хабар қилди.

Қайд этилишича, Саудия Бош муфтийси шайх Солиҳ бин Фавзон ал-Фавзоннинг кам учрайдиган ва кескин баёноти мамлакат чегараларида хизмат қилаётган ҳарбийларга қаратилган. Унда Қуръон оятлари ҳамда Муҳаммад пайғамбарнинг қурбонлик ва Аллоҳ йўлидаги курашга оид ҳадисларидан кенг фойдаланилган.

Баёнот Саудия Арабистони ва ҳусийлар ўртасида бир неча ҳафтадан бери кучайиб бораётган зўравонликлар фонида янгради. Ҳусийлар Саудия ҳудудига ракеталар ва дронлар орқали зарбалар берган, Саудия эса бунга ҳаво ҳужумлари билан жавоб қайтарган.

Шу билан бирга, Саудия қўллаб-қувватлаётган Яман ҳукумати кучлари билан биргаликда кенг кўламли ҳарбий операция бошланиши мумкинлиги ҳақида саволлар пайдо бўлган.

“Бу буюк мамлакатни ҳимоя қилиш ва унинг ҳудудининг ҳатто бир қаричига қўл теккизмоқчи бўлган ҳар қандай кишини жазолаш энг буюк вазифалар ва Аллоҳнинг розилиги йўлида бажариладиган энг савобли амаллардан бўлиб, бу йўлда жон ва руҳлар фидо қилиниши мумкин”, дейилган кеча, 24 сентябрь куни кечқурун эълон қилинган баёнотда.

Баёнотда Саудия қўллаб-қувватлаётган ва халқаро ҳамжамият томонидан тан олинган Яман ҳукумати ҳокимиятини мамлакатнинг бутун ҳудудида тиклаш энг долзарб вазифалардан бири экани айтилган.

Яман ҳукумати кучлари икки ҳафта олдин стратегик аҳамиятга эга Боб ал-Мандаб бўғози устидан назоратни ҳусийларга бой берган. Бу Саудия учун жиддий зарба бўлган, чунки мамлакат 2015 йилдан буён Ямандаги можарога аралашиб келмоқда. Ўша йили Саудия Арабистони ҳусийларни Яман пойтахти Санодан сиқиб чиқариш мақсадида ҳарбий операция бошлаган, бироқ операция мақсадига эришилмаган.

Ямандаги сўнгги жанглар мамлакатда 12 йилдан бери давом этаётган фуқаролик урушидаги навбатдаги кескинлашув бўлди. Можаро 2022 йилда нисбатан музлатилган эди, бироқ ҳозир яна кучайиб, Эрон билан боғлиқ кенгроқ минтақавий урушга чамбарчас боғланди.

“Аллоҳ таолодан барчангизга ёрдам беришини, мамлакатларимиз ва севимли Яманни ҳар қандай зарардан асрашини сўраймиз. Шунингдек, ҳусийлар гуруҳи ва уни қўллаб-қувватлаётганларга тўлиқ мағлубият келтиришини сўраймиз”, дейилган баёнотда.

Бош муфтийнинг мактуби сунний мазҳабидаги Саудия Арабистони ҳукумати томонидан ҳусийларни обрўсизлантиришга қаратилган диний мазмундаги баёнотлар кучайиб бораётган бир пайтда янгради. Ҳусийлар исломнинг бошқа мазҳабига амал қилади.

Саудия давлат телеканаллари сўнгги ҳафталарда ҳусийлар мамлакат жанубидаги масжидга зарба бергани ҳақидаги видеоларни намойиш қилди. Саудия расмийлари, шунингдек, ҳусийларни Маккага, яъни исломдаги энг муқаддас шаҳарга ҳужум қилишда айблаган.

“Фронт чизиғида хизмат қилаётган биродарлар, ўз вазифангизни бажаришга доимо тайёр туришингиз, ҳукмдорлар ва ҳарбий қўмондонларга бўйсунишингиз ҳамда берилган буйруқларни ўта аниқлик билан бажаришингиз лозим”, дейилган Бош муфтий баёнотида.

Унда, шунингдек, саудиялик ҳарбийлар “Пайғамбар саҳобаларининг изидан бораётгани ва мусулмонларнинг муқаддас қадамжоларини ҳимоя қилаётгани” таъкидланган.

Эслатиб ўтамиз, Саудия Арабистони жорий йил 15 сентябрь куни мамлакатнинг бир қатор ҳудудларида, жумладан муқаддас Макка шаҳри ва мамлакатнинг иккинчи йирик шаҳри Жиддада хавфсизлик огоҳлантиришларини эълон қилганди.