Россиядаги тарихий сарой ёниб, кул бўлди (видео)

Россиянинг Санкт-Петербург шаҳрида жойлашган тарихий Миллер саройи тўлиқ ёниб кетди. Ёнғин 2 минг квадрат метр майдонни қамраб олиб, олов қўшни бинонинг томига ҳам ўтган. Бу ҳақда шаҳар Фавқулодда вазиятлар бошқармаси хабар қилди.

Қайд этилишича, ёнғин кеча, 1 октябрь куни соат 20:11 да Исаак майдонидаги бинода бошланган. Ёнғин соат 20:26 да иккинчи даражага, 21:12 да эса учинчи даражага ошгани қайд етилган. Ёнғин вақтида саройнинг томи қулаган.

Олов қўшни бинонинг томига ҳам ўтиб, 250 квадрат метр майдондаги конструкцияларга зарар етказган. У ерда меҳмонхона жойлашгани сабаб барча ходимлар ва меҳмонлар эвакуация қилинган. Ёнғин ҳудудидан 10 киши қутқарилган. Жабрланганлар ҳақида маълумот берилмаган.

Ёнғинни ўчиришга 165 нафар қутқарувчи ва 37 та техника жалб қилинган. Сувни узлуксиз етказиб бериш учун Нева дарёсидан ёнғин жойигача магистрал қувур тортилган.

Фавқулодда вазиятлар вазирлиги вакили Андрей Литовканинг айтишича, бинодаги ёғоч қаватлар ва тўсиқлар, шунингдек, юқори ҳарорат, бўшлиқлар, очиқ жойлар, мураккаб режалаштириш ва қўшимча қурилмалар оловнинг тез тарқалишига сабаб бўлган.

Соат 00:40 да ёнғиннинг тарқалиши тўхтатилган ва унинг тоифаси иккинчи даражага туширилган. Очиқ олов соат 01:45 да тўлиқ ўчирилган. Шундан сўнг қутқарувчилар конструкцияларни қайта ёнғин чиқишининг олдини олиш учун сув билан совитишда давом этган.

Ҳодиса юзасидан Россия Тергов қўмитаси текширув бошлаган. “Фонтанка“ нашрининг Фавқулодда вазиятлар вазирлигидаги манбаси ёнғинга қасддан ўт қўйиш сабаб бўлиши мумкинлигини айтган. Бироқ вазирлик матбуот хизмати раҳбари ёнғин тўлиқ ўчирилмасдан туриб унинг сабаблари ҳақидаги версияларни муҳокама қилишга ҳали эрта эканини билдирган.

Маълумот учун, Миллер саройи XVIII асрнинг иккинчи ярмида қурилган. 1879 йилда мулкни истеъфодаги муҳандис-подполковник Карл Миллер сотиб олган ва уни қайта қуришни меъмор бўлган укаси Франс-Фердинанд Миллерга топширган. 2021 йилда сарой ва даромад уйи минтақавий аҳамиятга эга маданий мерос объектлари реестрига киритилган. Сўнгги йилларда бўш турган бинони “ТАС“ компанияси реставрация қилиб, элита уй-жойига мослаштиришни режалаштирган. Лойиҳа қиймати 700 млн рублдан ортиқ деб баҳоланган, ишларни эса 2027 йилда якунлаш мўлжалланган.

Компания кеча, 1 октябрь куни бинода реставрация ишлари бошланганини билдирган. Кейинчалик эса аниқлик киритиб, ёнғин олдидан саройда реставрациянинг ўзи эмас, балки унга тайёргарлик ишлари олиб борилганини маълум қилган. Ёнғин вақтида бинода ишчилар бўлмаган.

Эслатиб ўтамиз, кеча, 1 октябрь куни Россиянинг Москва вилоятидаги Краснозаводск кимё заводида кучли портлаш содир бўлиб, 7 киши ҳалок бўлганди.