Роналдиньо катта футболга қайтиши сабабини тушунтирди

Бразилия терма жамоасининг собиқ ҳужумчиси Роналдиньо профессионал фаолиятини якунлаганидан бир неча йил ўтиб, футбол майдонига қайтишга қарор қилгани футболни соғинганлиги ва келажакдаги режалари сабаб бўлганлиги билан изоҳлади. Бу ҳақда Роналдиньо “Sky sport” нашрига берган интервьюсида сўз очди.

“Бунга “Равенна” президенти Иньяцио Сиприани билан дўстлигимиз ва келажакдаги режаларимиз сабаб бўлди. Ҳаётимдаги ўзига хос, такрорланмас лаҳзани бошдан кечиришни истайман. Ушбу кун бошқа футболчилар учун ҳам эсда қоларли бўлади, деб умид қиламан. Фаолиятимни якунлаганимдан сўнг ортга назар ташлаб, ўз олдимга қўйган барча мақсадларимга эришганимни англадим. Энди яна футбол ўйнаш имкониятига эга бўлдим ва бундан завқланяпман. Шунингдек, мухлисларга ажойиб кунни тақдим этмоқчиман. Бу янги саргузаштни бошлашдан жуда хурсандман”,  дейди Роналдиньо. 

Маълумот учун, 46 ёшли бразилиялик футболчи “Равенна” сафида С Серия доирасида “Форли”га қарши учрашувда дебют қилиши кутилмоқда. Учрашув бугун, 15 ноябрь куни бўлиб ўтиши режалаштирилган.

Эслатиб ўтамиз, жорий йилнинг август ойида Роналдиньо ва “Равенна” клуби бразилиялик собиқ футболчининг камида битта расмий учрашувда иштирок этиши бўйича келишувга эришган. Шунингдек, клуб унинг R10 брендига тегишли белгилардан фойдаланиш ҳуқуқини қўлга киритган. Роналдиньо эса клуб акцияларидан улуш сотиб олган.