Президент тадбиркорларга “маска шоу”лар ҳақида китоб ёзишни тавсия қилди

Президент Шавкат Мирзиёев чемпион тадбиркорларга ўзларининг сўнгги 10 йилликдаги тажрибаси ва ушбу даврда нималар бўлгани, бундан ташқари илгари бўлган “маска шоу”лар ҳақида ёшлар учун китоб ёзишни тавсия қилди. Бу ҳақда Президент кеча, 18 август куни тадбиркорлар билан очиқ мулоқотда сўз очди.

Президент китоб ёзишни тавсия қилган чемпион тадбиркорлар орасида Тоҳир Шарипов, Улуғбек Рустамов, Зафар Ҳошимов, Шуҳрат Эргашев, Фарҳод Мамажонов, Шуҳрат Илҳомов, Фахриддин Илёсов ва Зафар Мустафоевлар бор эди.

“Биласизларми, нима учун керак? Мана, ораларингизда ёш тадбиркорлар ўтирибди. Бугун биринчи марта 25 минг тадбиркор қатнашяпти. Уларга сизларнинг йўлларингиз ўрнак бўлади. Сизларга ўхшашга ҳаракат қилади. Баландпарвоз гап эмас: чемпион тадбиркорларимиз, сизлар бизнинг фахримиз, сизлар бизнинг, қаҳрамонларимиз, десак ҳам тўғри бўлади. Сизлар қанча қийин йўлдан ўтгансизлар, лекин буларга осон бўляпти. Шу осонликни инобатга олиб, булар икки карра кўп натижага эришиши бўйича даъват қилсаларингиз, мен сизлардан миннатдор бўламан”, дейди Ўзбекистон Президенти. 

Очиқ мулоқот давомида тадбиркор Жаҳонгир Ортиқхўжаев аввалги даврлардаги тадбиркорлик билан боғлиқ муаммолар ва қийинчиликларга тўхталган. 

“Илгарилари юрагимизни ҳовучлаб, бизнесимизни ривожлантиришни эмас, жон сақлашни ўйлардик. Ўша азобли кунлар, “маска шоу”лар бизни шунчалик безитиб қўйгандики, “тадбиркорлик” деган сўзнинг ўзи хавотир уйғотарди”, дейди у. 

Ортиқхўжаевнинг айтишича, илгари ҳалол меҳнати билан оёққа турган тадбиркор худди жиноятчидек хавотир ичида яшаган. 

“Тадбиркорлик қилиб, бошига не-не кулфатлар келганини шу ерда ўтирган, сочига оқ тушган тадбиркорлар жуда яхши эслаймиз. Бугунги ёш тадбиркорлар жаннатда яшаяпти. Албатта, буни қадрига етишлари керак. Бугун тадбиркорлар қўрқмай, ҳадиксирамай, эркин ишлаяпти, чунки бизнинг ортимизда суянган тоғимиз, президентимиз бор”, дейди Ортиқхўжаев. 

Шунингдек, у қўшни давлатлар ва чет элдаги тадбиркорлар Ўзбекистонга ҳавас қилишини айтган. Шундан сўнг, Президент Ортиқхўжаевга чемпион тадбиркорлар китобини биринчи ўзи ёзиши кераклигини айтган. 

“Биринчи сенга топшириғим, мана шуни ўзинг ёзасан. Уч ойда бир сифатли қилиб, ана шу “маска шоу”ни ҳам ёзгин”, дейди Президент.

Ортиқхўжаев эса китобни ҳамма деталлар билан ёзиб, Президентга кўрсатишини билдирган.