Польша Бош вазири яқин ойларни Украина учун ўта муҳим деб атади

Польша Бош вазири Дональд Туск яқин ойлар Украина, Польша ва бутун минтақа хавфсизлиги учун ўта муҳим бўлишини эълон қилди. Бу ҳақда у бугун, 29 август куни “Келажак Польшаси” тадбиридаги чиқиши чоғида айтиб ўтди.

“Шу муносабат билан биз воқеалар ривожининг турли сценарийларига тайёр бўлишимиз керак ва, шубҳасиз, яқин етти ой ўта муҳим бўлади. Украина-Россия уруши бурилиш нуқтасида турибди”, дейди у ва куз ҳамда қиш ойлари ҳал қилувчи аҳамиятга эга бўлишини таъкидлаган.

Туск Россиянинг “эскалацияга тайёргарлик кўраётгани ҳақидаги сигналлар” сабабли Польша ўз хавфсизлиги устида ишлашни давом эттиришини айтган. Унинг сўзларига кўра, Марказий разведка бошқармаси (МРБ) раҳбари Жон Рэтклиффнинг Москвага ташрифи ана шундай “сигнал”лардан бири бўлиб хизмат қилади. Кремль эса эскалация ҳақидаги даъволарни рад этмоқда. Шу билан бирга, Польша Бош вазири низони хоҳламаслигини таъкидлаган. 

“Мен жанжал излайдиган энг охирги одамман. Сиёсатда романтизмни ёқтирмайман. Биласизми, ёввойи далалардаги уланлар ҳужуми тушимга кирмайди. Мен Польшани қўшнилар билан ҳар қандай низолардан асраш учун қўлимдан келган ҳамма нарсани қиляпман”, дея ишонч билдирган у.

Қайд этиш жоиз, жорий йилнинг 25 август куни АҚШ Марказий разведка бошқармаси директори Жон Рэтклифф Россия пойтахти Москвага эълон қилинмаган музокаралар учун борган эди.

Шундан сўнг, Россия Президентининг матбуот котиби Дмитрий Песков АҚШ Марказий разведка бошқармаси директорининг Москвага ташрифи икки мамлакат махсус хизматлари ўртасидаги алоқалар билан боғлиқ бўлганини маълум қилди. Шунингдек, Россия Ташқи разведка хизмати раҳбари Сергей Наришкин ҳам Жон Рэтклифф билан Москвада учрашганини тасдиқлади.

Кеча, 28 август куни эса АҚШ Президенти Дональд Трамп Марказий разведка бошқармаси директори Жон Рэтклиффни Москвага махфий сафарга шахсан ўзи юборгани маълум бўлди.

Эслатиб ўтамиз, аввалроқ Россия Президенти Владимир Путин Украина бўйича тинчлик музокаралари берк кўчага кириб қолди деб ҳисоблашини ва жанговар ҳаракатлар кучайишига тайёргарлик кўраётгани ҳақида хабар берилган эди.