Париждаги тартибсизликлар ПСЖ ва “Барселона” ўйинига таъсир қиладими?

Франция пойтахти Парижда кузатилаётган тартибсизликлар Чемпионлар лигасининг асосий босқичи доирасидаги “Пари Сен-Жермен” ва “Барселона” ўртасидаги учрашувга халақит бермайди. Бу ҳақда Франция Ички ишлар вазири Лоран Нунес маълум қилди.

Учрашув бугун, 20 октябрь куни Париждаги “Парк де Пренс” стадионида бўлиб ўтиши ва Тошкент вақти билан соат 23:55 да бошланиши белгиланган.

Нунес юқори мартабали амалдорлар иштирокида ўтказилган фавқулодда йиғилишдан сўнг футбол учрашувлари каби олдиндан режалаштирилган тадбирларни бекор қилиш масаласи муҳокама қилинганини айтган. Бироқ унинг билдиришича, бу қарор ПСЖ ва “Барселона” ўртасидаги ўйинга тааллуқли эмас. Вазир шу ҳафта Европа майдонларида ўтказилиши режалаштирилган бошқа учрашувлар ҳам белгиланган муддатда бўлиб ўтишини қўшимча қилган.

Нунеснинг ўзи жорий йилнинг 18 октябрь куни истеъфога чиқиш учун ариза берган. Бироқ Франция Президенти Эммануэль Макрон фавқулодда вазият шароитида полиция фаолиятини мувофиқлаштириш учун ундан ўз лавозимида қолишни сўраган.

Францияда норозилик намойишлари сентябрь ойи ўрталаридан бошланган. Дастлаб Париж атрофидаги мактаб ўқувчилари таълим шароитларини яхшилаш талаблари билан кўчага чиққан. Кейинчалик уларга мамлакат бўйлаб нархлар ошишидан норози бўлган фуқаролар ҳам қўшилган ва намойишлар бошқа ҳудудларга тарқалган.

Жорий йилнинг 17 октябрь куни ўтказилган йирик умуммиллий намойишлар тартибсизликларга айланган. Намойишлар давомида айрим дўконлар талон-торож қилинган, витриналар синдирилган ва қимматбаҳо брендлар дўконларидан, хусусан, Париж ҳамда Марселдаги савдо нуқталаридан буюмлар ўғирланган.

Эслатиб ўтамиз, аввалроқ Марсель шаҳрида талончилар “Олимпик Марсель” футбол клубининг расмий дўконига бостириб кириб, уни талон-торож қилгани ҳақида хабар берилганди.