Ozon яна нишонда: Украина бу сафар Ростовдаги омборни бомбалади

Бугун, 29 августга ўтар кечаси Ростов вилоятида Украина дронлари ҳужуми оқибатида Ozon’нинг логистика марказларидан бирида ёнғин чиқди. Бу ҳақда РБК хабар берди.

Ozon логистика компанияси маълумотига кўра, ёнғин кичик бўлган ва тезда ўчирилган. Марказ фаолияти фавқулодда хизматлар ҳудудни кўздан кечириши учун вақтинча тўхтатилган. Сотувчилардан етказиб беришларни қабул қилиш ҳам тўхтатилган, йўлда бўлган юклар эса бошқа объектларга йўналтирилмоқда.

Шунингдек, Ростов вилоятидаги Ozon’нинг иккинчи логистика маркази ҳам хавфсизлик нуқтаи назаридан вақтинча ёпилган. Ушбу объект зарар кўрмаган, жабрланганлар ҳам йўқ. Сотувчиларга етказиб бериш ва FBS-жўнатмаларини кейинги кунга кўчириш ёки уларни буюртмаларни қабул қилиш ва топшириш пунктлари орқали юбориш таклиф қилинган.

Бундан ташқари, Ростов вилоятидаги ҳужум оқибатида жами етти киши жабрланган. Ростов-Донда тўрт киши, жумладан, икки бола шифохонага ётқизилган. Болалардан бирининг аҳволи оғир. Яна уч киши Аксай туманида тиббий ёрдам сўраган.

Ростов-Доннинг Пролетар туманида дронлар бўлаклари тушиши оқибатида икки кўп қаватли уй зарар кўрган. Аҳоли эвакуация қилинмоқда.

Аксай туманида эса дрон бўлаклари омборлар ҳудудидан топилган, шунингдек, ўрмонзорда ёнғин чиққан. Багаевский туманида хусусий уйларнинг ойналари зарар кўрган. У ерда жабрланганлар йўқ.

Эслатиб ўтамиз, аввалроқ Россиянинг Оренбург ва Уфа шаҳарларидаги Ozon компаниясининг логистика объектлари Украина дронлари ҳужумига учраган эди.