“Онасини деразадан улоқтирганини кўрдим“. Гуллунинг қизига умрбод қамоқ сўралди

Туркиялик машҳур хонанда Гуллунинг ўлими бўйича судда унинг қизи Туғян Улкем Гюлтернинг дугонаси Султон Нурўғли “Туғян онасини деразадан улоқтирганини кўрдим”, дея кўрсатма берди. Прокурор Гюлтерни оғирлаштирилган умрбод қамоқ жазосига ҳукм қилишни сўради. Бу ҳақда “Sözcü” хабар берди.

“Гуллу” номи билан танилган 52 ёшли Гул Тут 2025 йилнинг 26 сентябрь куни Ялова вилояти Чинаржик туманидаги уйининг 6-қаватидан йиқилиб, вафот этганди. Унинг ўлими бўйича иш юзасидан ҳибсда сақланаётган қизи Туғян Улкем Гюлтер судда илк бор кўрсатма берди ва ўзига қўйилган айбловларни рад этди.

Гюлтернинг айтишича, воқеа куни у дугонаси Султон Нурўғли билан бирга бўлган. Улар уйда фильм томоша қилиб, кўнгилхушлик қилган. Гюлтер онаси хонага кириб, улар билан бирга ўйнаганини, кейин эса орқаси ўгирилган пайтда “бам” деган овоз эшитганини айтган.

“Орқамга қарасам, онам йиқилиб тушган экан. Султонга “югур” дедим ва бирга пастга тушдик. Мен орқам билан турган эдим, онам йиқилиб тушди. Унга бирор нарса текканини кўрмадим”, деган у.

Бироқ Гюлтернинг дугонаси судда бошқача кўрсатма берган.

“Биз хонада эдик ва кўнгилхушлик қилаётгандик. Гуллу хонага кирди. Ўша пайтда мен ойнага ўгирилиб, аввал бошимдан ўтган бахтсиз ҳодиса сабаб қолган жароҳатларимга қараётгандим. Орқамга ўгирилганимда, Туғяннинг онасини деразадан улоқтирганини кўрдим. Кейин у менга “югур”, деди”, деган Султон Нурўғли.

Шунингдек, у дастлаб воқеа ҳақида бошқача кўрсатма берганини, бунга қўрқув ва босим сабаб бўлганини билдирган. Кейинчалик адвокатига ҳақиқатни айтмоқчи эканини билдирган ва ҳибсга олингач, ўз кўрганларини айтган.

Бундан ташқари, Султон Нурўғли дафн маросими куни Гюлтернинг унга “Мени куйдирсанг, мен ҳам сени куйдираман”, деганини айтган.

Гюлтернинг ўзи эса Нурўғли босим остида кўрсатма берганини билдирган.

“Султон босим остида эди, шунинг учун бундай кўрсатма берган. Мен ҳам полиция бўлимида катта босим кўрдим”, деган у.

Судда прокурор Туғян Улкем Гюлтерга оғирлаштирилган умрбод қамоқ жазоси тайинлашни ва унинг ҳибсда қолишини сўраган.

Суд ҳайъати эса Гюлтернинг ҳибсда сақланишини давом эттиришга қарор қилган. Кейинги суд мажлиси жорий йилнинг 9 октябрь куни соат 09:00 га белгиланган.

Эслатиб ўтамиз, аввалроқ Туркиялик хонанда Гуллунинг ўлими бўйича терговда янги видеокадрлар пайдо бўлгани ҳақида хабар берилган эди. Унда хонанданинг қизи Туғян Улкем Гюлтер воқеадан кейин полиция ходимлари билан бирга уйга кириб келгани ва ваҳима ичида онасининг аҳволи ҳақида қайта-қайта сўрагани акс этган.