Олимпиадада совриндор бўлган санкт-петербурглик спортчиларга қанча пул берилиши очиқланди

2024 йилги Олимпия ва Паралимпия ўйинларида ғолиб чиққан ҳар бир санкт-петербурглик спортчи шаҳар ҳокимиятидан 5 миллион рубль (салкам 722 миллион сўм) пул мукофоти олади. Бу ҳақда “Фонтанка” портали хабар берди.

Кумуш медаллар учун спортчилар 2,5 миллион рубль, бронза медаллари учун – 1,5 миллион рубль, шунингдек, тўртинчи, бешинчи ва олтинчи ўринни эгаллаган спортчиларга мос равишда 678 минг, 452 минг ва 339 минг рубль мукофоти тақдим этилади.

Қайд этилишича, тўртинчи ўрингача бўлган совринлар жамоавий спорт турлари вакиллари учун ҳам тасдиқланган, бироқ Халқаро Олимпия қўмитаси (ХОҚ) россияликларга жамоавий мусобақаларда қатнашишни тақиқлаган.

Маълумот учун, Париж мезбонлик қиладиган Олимпия ўйинлари 26 июлдан 11 августгача бўлиб ўтади. Чекловлар россиялик ва беларуслик спортчиларга тааллуқли. Парижда рус ва беларус спортчилари фақат нейтрал мақомда мусобақаларда қатнашиши мумкин бўлади. 15 июнь куни ХОҚ Олимпиадага қабул қилинган россиялик спортчиларнинг биринчи рўйхатини эълон қилди. Унинг таркибига 14 киши киритилди.