ОФК Қатарни Инфантинони қўллаб-қувватлагани учун танқид қилди

Осиё футбол конфедерацияси (ОФК) Қатар футбол ассоциациясини FIFA президенти Жанни Инфантинони қўллаб-қувватлагани учун танқид қилди. Бу ҳақда “The Times” хабар берди.

Аввалроқ, Марокаш, Қатар ва яна тўртта араб давлати футбол федерациялари Инфантинони қўллаб-қувватлашини маълум қилган эди.

“Қитъалараро бирдамлик энг муҳим бўлган бир пайтда, сизнинг ҳозирги позициянгиз ва ОФК президентининг қонуний ваколатларини шубҳа остига қўювчи ҳаракатларингиз Осиё футболи бирлигига путур етказади. Бу эса глобал майдонда Осиё футбол оиласи манфаатларини ҳимоя қилиш бўйича жамоавий қобилиятимизни заифлаштиради”, дейди ОФК президенти Салмон бин Иброҳим Ал Ҳалифа.

Бунгача Инфантино Жаҳон чемпионати трансляция ҳуқуқларидаги улушни хусусий инвесторларга сотишни таклиф қилган эди. Бироқ турли ташкилотлар томонидан билдирилган танқидлардан сўнг у мазкур ғоядан воз кечди.

Хусусан, Инфантинонинг таклифи Европа футбол иттифоқи (UEFA), КОНКАКАФ, ОФК ва Жанубий Америка футбол конфедерацияси (CONMEBOL) томонидан рад этилди.

Шу билан бирга, UEFA FIFA ҳомийлигидаги турнирларни бойкот қилиш эҳтимолини билдириб, халқаро федерация президентига бўлган ишонч йўқолганини маълум қилди.

“The Telegraph” хабар беришича, агар Инфантино ўз ихтиёри билан истеъфога чиқишдан бош тортса, UEFA унга нисбатан ишончсизлик вотуми ўтказиш ниятида. Африка футбол конфедерацияси (CAF) ва бир қатор миллий футбол ассоциациялари эса Инфантинони қўллаб-қувватлашини билдирган.

Маълумот учун, 56 ёшли Жанни Инфантино 2016 йил февраль ойида бўлиб ўтган навбатдан ташқари конгрессда FIFA президенти этиб сайланган. Кейинчалик у икки марта рақобатсиз қайта сайланган. Навбатдаги FIFA президенти сайлови 2027 йил март ойида ўтказилиши режалаштирилган.