Норвегия қироли касалхонага ётқизилди

Норвегия қироли Ҳаральд V танасида суюқлик тўпланиши сабабли касалхонага ётқизилди ва 2 ҳафта муддатга касаллик таътилига чиқди. Бу ҳақда мамлакат Қироллик саройи хабар қилди.

Қайд этилишича, 89 ёшли қирол кам учрайдиган қон касаллиги – гемолитик анемиядан даволанмоқда. У йўқлигида тахт вориси шаҳзода Ҳокон қироллик вазифаларини бажаради.

Сарой маъмурияти 2024 йил апрель ойида Ҳаральд V ёши катталашиб бораётгани сабабли расмий тадбирларини доимий равишда қисқартиришини маълум қилган эди. 1991 йил январидан бери тахтда бўлган Ҳаральд V Европада энг узоқ вақт ҳукмронлик қилган монархлардан бири ҳисобланади. Қирол тахтдан воз кечишни қатъий рад этиб келмоқда.

Ҳаральд V жорий йилнинг февраль ойида Испаниянинг Тенерифе оролида инфекция ва суюқлик йўқотиши сабабли касалхонага ётқизилган. 2024 йилда эса Малайзияда таътил пайтида бетоб бўлиб, юрак стимулятори ўрнатиш учун шифохонага олиб кетилган.

Сарой, шунингдек, қиролича Соня ҳам жорий йил май ойида юрак билан боғлиқ муаммолар сабабли текширув ва кузатув учун касалхонага ётқизилганини маълум қилган.

Қироллик ва Эпштейн можароси

Қироллик оиласидаги саломатлик билан боғлиқ муаммолар Норвегия саройи учун беқарор даврдан кейин юзага келди. Тахт вориси шаҳзода Ҳоконнинг рафиқаси малика Метте-Марит март ойида миллий телеканалга берган интервьюсида америкалик жинсий жиноятчи Жеффри Эпштейн билан ҳеч қачон танишмаган бўлишни исташини айтган.

Малика 2011-2014 йиллар оралиғида Эпштейн билан юзлаб электрон мактублар алмашганини ва унинг Флоридадаги уйида меҳмон бўлганини маълум қилган. У Эпштейннинг ўтмиши ва фаолиятини етарлича синчиклаб ўрганмагани учун масъулиятни ўз зиммасига олганини айтган.

Эслатиб ўтамиз, маликанинг бу баёнотидан 3 ой ўтиб, июнь ойида Метте-Маритнинг аввалги турмушидан бўлган ўғли Мариус Борг Ҳёйби икки алоҳида зўрлаш айблови бўйича айбдор деб топилиб, тўрт йиллик қамоқ жазосига ҳукм қилинганди.