“Нефтчи” футболчиси Элит ОЧЛ турнирида икки учрашувга четлатилди

Фарғонанинг “Нефтчи” клуби ярим ҳимоячиси Икром Алибоев Элит Осиё Чемпионлар лигаси турниридаги иккита учрашувни ўтказиб юборади. Бу ҳақда ОФК Тартиб-интизом ва этика қўмитаси хабар берди.

Осиё футбол конфедерацияси Тартиб-интизом ва этика қўмитасининг кеча, 28 октябрь куни қабул қилган қарорига кўра, футболчи гуруҳ босқичида “Ал-Наср”га қарши баҳсда рақибга нисбатан ўта қўпол ҳаракат қилгани ва тўғридан тўғри қизил карточка олгани учун ОФК Тартиб-интизом кодексининг 47-моддаси асосида икки учрашувга дисквалификация қилинган.

Алибоев жазонинг автоматик бир ўйинлик қисмини жорий йилнинг 26 октябрь куни “Ал-Иттиҳод”га қарши баҳсда ўтаб бўлган. Шу сабабли у 2 ноябрь куни Эроннинг “Трактор” клубига қарши сафар учрашувида ҳам жамоасига ёрдам бера олмайди.
Бундан ташқари, футболчига 2000 АҚШ доллари миқдорида жарима белгиланган. Ушбу маблағ 30 кун ичида тўланиши керак.

Эслатиб ўтамиз, фарғоналиклар жорий йилнинг 12 октябрь куни “Ал-Наср”га қарши баҳсда 1:3 ҳисобида мағлубиятга учраган эди.