NASA’нинг X-59 самолёти соатига 1625 километр тезликка чиқди

NASA’нинг X-59 Quiet SuperSonic Aircraft экспериментал товушдан тез самолёти парвоз дастури бошланганидан бери энг тиғиз синов ҳафтасини ўтказди ва етти кун ичида парвозлар сони бўйича рекорд ўрнатиб, турли тезлик ва баландликларда манёврларни бажариш қобилиятини намойиш этди. Бу ҳақда NASA хабар берди.

Қайд этилишича, X-59 самолёти жорий йилнинг 22 сентябрь куни иккита парвозни амалга оширган, сўнгра 24 ва 25 сентябрь кунлари яна иккитадан парвозни бажарган. Шу тариқа, бир ҳафта ичида самолёт олти марта ҳавога кўтарилган. X-59’нинг аввалги ҳафталик рекорди бирданига иккита парвозга ортда қолдирилган. Ушбу сериядан сўнг самолётнинг умумий синов парвозлари сони 38 тага етган.

Бу каби жадвал X-59 парвоз диапазонини кенгайтириш дастурининг бир қисми ҳисобланади. Синовларнинг ушбу босқичида NASA самолётнинг турли тезликлар, баландликлар ва манёвр қилиш режимларидаги хусусиятларини текшириб, парвоз шароитларини келажакда аппарат фойдаланилиши керак бўлган шароитга яқинлаштирмоқда.

Синовлар суръатининг ошиши билан бир вақтда X-59 янги тезлик рекордини ҳам ўрнатган. Ўтган ҳафтадаги парвозлардан бирида самолёт соатига 1625 километр тезликка эришган. Бу X-59 томонидан бугунги кунга қадар эришилган максимал тезлик.

Тиғиз синов ҳафтасидан сўнг X-59 қарийб уч ҳафта давом этадиган режали техник хизмат кўрсатиш жараёнига юборилган. Шундан сўнг мутахассислар самолётни текширувдан ўтказади. Текширув якунлангач, жамоа X-59’ни парвозларга қайтаришни ва жадал синовлар дастурини давом эттиришни режалаштирмоқда.