Нью-Йоркда Инфантинони лавозимидан четлатишга чақирувчи баннер пайдо бўлди

Нью-Йорк шаҳридаги Таймс-сквер майдонида FIFA президенти Жанни Инфантинони лавозимидан четлатишга чақирувчи баннер пайдо бўлди.

Реклама экранида навбатма-навбат “Футбол конфедерациялари, Инфантинони четлатинг” ва “FIFA дилерга эмас, етакчига муносиб” деган ёзувлар, шунингдек, #InfantinoOut хештеги намойиш этилди.

Акция ташкилотчилари ўзларини футбол мухлислари номидан ҳаракат қилаётганини билдириб, Инфантинони халқаро футбол ҳуқуқларини хусусий инвесторларга беришга уринишда айблади. Улар мухлисларни Инфантинонинг турнир ва учрашувлардаги иштирокига қарши норозилик билдиришга ҳамда FIFA тадбирларини бойкот қилишга чақирди.

Норозиликлар FIFA’нинг “FIFA Forward Enterprise” лойиҳаси атрофидаги можародан кейин кучайди. Ушбу режа доирасида янги тижорий компаниянинг 20 фоизлик улушини хусусий инвесторларга сотиш орқали тахминан 4,2 миллиард доллар жалб қилиш кўзда тутилган эди. Бироқ UEFA ва бошқа футбол ташкилотларининг кескин қаршилигидан сўнг FIFA лойиҳани бекор қилди.

Эслатиб ўтамиз, аввалроқ FIFA Лондонда жойлашган “Ten Toes Media” маркетинг агентлиги билан Жанни Инфантинонинг обрўсини ҳимоя қилиши учун 2,7 миллион евролик шартнома имзолагани ҳақида хабар берилганди.