Месси футболни ўзгартирди – Инфантино
Sport
−
10:38 342 2 minutes
Аргентина терма жамоаси сафида саккиз карра “Олтин тўп” соҳиби Лионель Мессининг ўйинлари миллионлаб инсонларни илҳомлантирди ва футболни ўзгартирди. Бу ҳақда FIFA президенти Жанни Инфантино ўзининг Instagram саҳифасида ёзди.
Кеча, 31 август куни Месси Аргентина терма жамоасидаги фаолиятини якунлашини маълум қилган эди.
“Лионель Мессини терма жамоадаги ажойиб фаолияти билан табриклайман. Унинг ўйинлари миллионлаб инсонларга илҳом берди ва бу гўзал спортни ўзгартирди. Аргентина терма жамоаси либосидаги барча унутилмас онлар ва бутун дунё мухлисларини бирлаштирганингиз учун ташаккур. Унга фаолиятининг кейинги босқичида омад тилайман”, деб ёзди Инфантино.
Маълумот учун, 39 ёшли Месси 2023 йилдан бери Шимолий Америка Олий футбол лигаси (MLS) вакили “Интер Майами”да тўп тепиб келмоқда. Европада аргентиналик футболчи Франциянинг ПСЖ ва Испаниянинг “Барселона” клубларида ўйнаган. “Барселона” билан у тўрт марта Чемпионлар лигаси, уч мартадан UEFA Суперкубоги ва Клублар ўртасидаги жаҳон чемпионатида ғолиб чиққан.
Ҳужумчи 2022 йилги жаҳон чемпиони, 2014 ва 2026 йилги Жаҳон чемпионатларининг кумуш медали соҳиби, 2008 йилги Олимпиада чемпиони ҳамда 2021 ва 2024 йиллардаги Копа Америка ғолиби ҳисобланади. Месси “Олтин тўп”ни энг кўп марта қўлга киритган футболчи – 8 карра соврин соҳиби.
Месси Аргентина терма жамоаси сафида 207 та учрашувда майдонга тушиб, 125 та гол урган. У ҳар икки кўрсаткич бўйича ҳам терма жамоа рекордчиси ҳисобланади. Ҳужумчи жаҳон чемпионатларида олти марта иштирок этган.
