Мен Исроилга бориб, бош вазир бўлишим мумкин – Трамп 

АҚШ Президенти Дональд Трамп можаро тугаганидан сўнг Исроил бош вазири “бўлиши мумкинлигини” айтди. Бу ҳақда у “Salem News Channel” телеканалига телефон орқали берган интервьюсида гапирди.

Исроилга доимо қатъий ёрдам кўрсатиб келганини айтган Трамп ўз позицияси ўзгармаганини ва ҳамон АҚШнинг энг исроилпараст президентларидан бири бўлиб қолаётганини қайд этган. Оқ уй раҳбари Исроил жамоатчилиги орасида уни қўллаб-қувватлаш даражаси юқори эканига эътибор қаратган. 

“Исроилда мени қўллаб-қувватлаш рейтинги 99 фоизни ташкил этади, мен у ерда энг машҳур инсонман. Буларнинг барчаси тугагач, мен Исроилга бориб, бош вазир бўлишим мумкин”, дейди Америка етакчиси.

Трамп, шунингдек, Мичигандаги сайловларда Демократик партия номзоди, мусулмон Абдул ал-Саид ўзининг республикачи рақибига қараганда яҳудий сайловчиларнинг кўпроқ овозини олганини эслатиб ўтган. АҚШ Президенти буни тушунмаслигини маълум қилган.

Шунингдек, Трамп Эроннинг ядро қуролига эга бўлишига йўл қўймаслик учун ҳарбий куч ишлатишда иккиланган бўлармидингиз, деган саволга: “Йўқ, бир сония ҳам иккиланмасдим”, дея жавоб берган. Америка етакчиси Эронга қарши кенг кўламли “ҳарбий операциялар” қайта бошланиши эҳтимолини истисно этмаган. Тегишли саволга у: “Эҳтимол”, деб жавоб қайтарган.

Трамп АҚШ Эрон масаласида “жуда яхши олдинга силжиётганини” таъкидлаган ва ҳозирда Ҳормуз бўғози орқали уруш бошланишидан олдингига қараганда кўпроқ нефть ўтаётганини даъво қилган.

“Биз Венесуэлада ўз мақсадимизга эришдик ва Ҳормуз бўғозини назорат қиляпмиз. Бўғоз тўлиқ бизнинг назоратимиз остида”, дейди Трамп ва Эрон билан урушни АҚШ учун “осон” деб атаган.

Президентнинг сўзларига кўра, АҚШ Эрон билан урушда ўзи зарур деб билган исталган вақтда ғалаба қозониши мумкин ва муддат фақат Вашингтонга боғлиқ.

“Ҳозир биз ушбу урушда ғалабага эришиш жараёнидамиз”, дейди у.

АҚШнинг Кубага ҳарбий аралашуви эҳтимоли ҳақидаги саволга жавоб берар экан, Трамп: “Лавозимни тарк этишимдан олдин Куба масаласини ҳал қилмоқчиман”, дейди у.

Трамп АҚШ Давлат котиби Марко Рубио Куба йўналиши бўйича ишларни “жуда яхши” олиб бораётганини ва зарур қадамларни ташлаётганини урғулаган.

“Биз вазиятни жуда диққат билан кузатиб боряпмиз. Ҳаммаси ниҳоятда ёмон тус олмоқда, аслида Куба – муваффақиятсизликка учраган давлат”, дея баёнот берган Америка етакчиси.

Ҳатто гап чекланган ҳарбий операция ҳақида кетган тақдирда ҳам, Кубага қарши ҳарбий куч ишлатиш унинг учун муаммо туғдирмайдими, деган саволга Трамп: “Мен учун бу мақбул. Мен, шубҳасиз, бундай имкониятни кўриб чиққан бўлардим”, дея жавоб берган.

Эслатиб ўтамиз, аввалроқ Дональд Трамп Исроил Бош вазири Биньямин Нетаньяху билан Эронга қарши ҳарбий ҳужумларни қайта бошлаш масаласида телефонда кескин тортишиб қолгани ҳақида хабар берилган эди. Суҳбатдан хабардор манбалардан бири икки етакчи ўртасидаги мулоқотни “дўзахдан чиққан бақир-чақир жанжали” деб таърифлаган.