Мен Ирландиянинг бирлашганини кўришни истардим – Трамп

АҚШ президенти Дональд Трамп Ирландия ва Шимолий Ирландиянинг бирлашишини исташини айтди. Бу ҳақда у Дублинга қилган ташрифи чоғида журналистлар билан суҳбатда сўз очди.

Қайд этилишича, Трамп бугун, 12 сентябрь куни Дублинга бориб, Ирландия Бош вазири Михол Мартин билан учрашган. Учрашувдан сўнг журналистлар билан суҳбатда у Буюк Британия таркибидаги Шимолий Ирландиянинг Ирландия Республикаси билан бирлашишини жуда исташини билдирган.

“Мен унинг бирлашганини кўришни истардим. Менимча, бу охир-оқибат содир бўлади ва бу ажойиб нарса бўлар эди”, деган Трамп.

У бирлашиш масаласида Буюк Британиянинг ҳам сўзи бўлишини тан олган. Бироқ Трампнинг бу баёнотлари АҚШ президентларининг Шимолий Ирландия масаласида анъанавий бетараф позициясидан фарқ қилади.

Маълум қилинишича, Трампнинг сўзлари Шимолий Ирландияда Британия билан бирликни сақлаб қолиш тарафдори бўлган кучли сиёсий доираларнинг танқидига сабаб бўлган. Хусусан, Демократик Юнионистлар партияси раҳбари Гэвин Робинсон Шимолий Ирландиянинг конституциявий келажагини Вашингтон, Лондон ёки Дублин эмас, ҳудуд аҳолиси белгилашини билдирган.

Айни пайтда Буюк Британия ҳукумати Ирландия билан бирлашиш бўйича янги референдум ўтказиш масаласида ўз позициясини ўзгартирмаган. Бундай референдум 1998 йилги “Хайрли жума” келишувига кўра Британия ҳукумати қарори асосида ўтказилиши мумкин.

Трамп, шунингдек, Ирландия Президенти Кэтрин Коннолли билан ҳам учрашган. Коннолли унга Ирландия халқи уруш ва геноцидни одатий ҳол сифатида қабул қилиш мумкин эмас, деган қатъий қарашга эга эканини билдирган.

Билдирилишича, Трампнинг ташрифига қарши Дублинда урушга қарши намойиш ҳам ўтказилган. Минглаб одамлар шаҳар марказида юриш қилиб, АҚШ Президентининг ташқи сиёсатига қарши шиорлар айтган.

Учрашувлардан кейин Трамп Ирландиянинг ғарбида жойлашган ўзининг гольф курортида ўтказилаётган Irish Open турнирини томоша қилиш учун йўл олган. Унинг Ирландияга ташрифи 12–13 сентябрь кунларига режалаштирилган.

Эслатиб ўтамиз, аввалроқ АҚШ Президенти Дональд Трамп Эрон билан давом этаётган уруш жорий йилнинг 3 ноябрь куни бўлиб ўтадиган АҚШ оралиқ сайловларидан кейин тугашини айтганди.