Мағлубиятга учрамаган боксчи 33 ёшида вафот этди

Пуэрто-Риколик собиқ боксчи Причард Колон 33 ёшида вафот этди. Бу ҳақда “The Ring” нашри хабар берди.

Колон ярим ўрта вазн тоифасида мағлубиятга учрамаган профессионал боксчи эди. Унинг сўнгги жанги 2015 йил октябрь ойида америкалик Террелл Уильямсга қарши бўлиб ўтган. Жанг давомида Уильямс Колоннинг боши орқа қисмига бир неча бор қоидага хилоф зарбалар берган.

Жангдан сўнг Колоннинг ҳолати кийиниш хонасида оғирлашиб, у ҳушидан кетган. Боксчи зудлик билан шифохонага ётқизилган ва субдурал гематомани олиб ташлаш учун операция қилинган. Шундан сўнг у 221 кун комада ётган.

Комадан чиққанидан кейин ҳам Колон ногиронлар аравачасида ва вегетатив ҳолатда қолган. У юриш ва гапириш қобилиятини тўлиқ йўқотган бўлса-да, махсус компьютер ва имо-ишоралар ёрдамида қисман мулоқот қила олган.

Маълумот учун, Уильямсга қарши жангга қадар Колон 16 та ғалабага эришган ва бирор марта ҳам мағлуб бўлмаган.