Куба инқироз фонида Фидель Кастро таваллудининг 100 йиллигини нишонлади

Кеча, 13 август куни Куба инқилоб раҳбари Фидель Кастро таваллудининг 100 йиллигини мамлакатдаги оғир иқтисодий инқироз шароитида нишонлади. Бу ҳақда “Reuters” хабар берди.

Юбилей тадбирларида Лотин Америкаси, Европа, Африка ва Осиёнинг 60 дан ортиқ давлатидан 1,5 мингдан зиёд фаоллар ва ҳамжиҳатлик ташкилотлари вакиллари иштирок этган.

Куба Президенти Мигель Диас-Канель Кастро мероси мамлакатнинг бугунги муаммоларини енгишда ҳам муҳим эканини таъкидлаган.

Айни пайтда Кубада иқтисодий вазият оғирлашган. АҚШ Президенти Дональд Трамп маъмурияти январь ойида мамлакатга нисбатан нефть эмбаргосини жорий қилган ва санкцияларни кучайтирган. Бу электр энергияси танқислигини янада кучайтириб, айрим ҳудудларда электр узилишлари кунига 20 соатдан ошишига олиб келган. Июль ойида мамлакат электр тармоғида уч марта умуммиллий узилиш қайд этилган.

Инқирозга жавобан Куба ҳукумати июнь ойида хусусий ва хорижий инвестицияларни жалб қилишга қаратилган 176 та иқтисодий чорадан иборат пакетни тасдиқлаган. Бу чоралар мамлакатнинг Кастро даврида шаклланган социалистик иқтисодий моделидан сезиларли чекинишни англатиши мумкин.

Маълумот учун, Фидель Кастро 1926 йил 13 августда туғилган. У 1959 йилги Куба инқилобига раҳбарлик қилган ва халқаро сўл ҳаракатнинг энг таъсирли сиёсий арбобларидан бири бўлган.