Кроуфорд фаолиятини давом эттиришга тайёрлигини айтди

Уч вазн тоифасида собиқ мутлақ жаҳон чемпиони Теренс Кроуфорд WBO версияси бўйича ўрта вазн чемпиони Жарон Эннисга қарши жанг ўтказиш учун профессионал фаолиятини тиклашга тайёрлигини билдирди. Бу ҳақда Кроуфорд ўзининг Х саҳифасида ёзиб қолдирди.

Кроуфорд ижтимоий тармоқда Эннисга мурожаат қилиб, агар рингга қайтса, кейинги жангида унга қарши чиқишга тайёрми, деб сўраган.

“Бир нарсани аниқ айтмоқчиман! Ҳаммангиз менинг қайтишимни ва яна рингга чиқишимни хоҳлаяпсиз, шундай эмасми? Жарон Эннис, агар мен қайтсам, кейинги жангда мен билан жанг қиласизми?” деб ёзди америкалик боксчи.

Эннис ҳам жангга тайёрлигини тасдиқлади.

“Теренс Кроуфорд, 1000 фоиз”, деб жавоб берди у.

Кроуфорд ўтган 2025 йил охирида профессионал боксдаги фаолиятини якунлашини эълон қилган эди. У сўнгги жангини 2025 йил 13 сентябрь куни ўтказиб, мексикалик Сауль “Канело” Альваресни ҳакамларнинг якдил қарори билан мағлуб этган. Шу тариқа Кроуфорд супер ўрта вазн тоифасида мутлақ жаҳон чемпионига айланганди.

Америкалик боксчи аввалроқ биринчи ярим ўрта вазн ва ярим ўрта вазн тоифаларида ҳам мутлақ жаҳон чемпиони бўлган. Шу тариқа у уч хил вазн тоифасида мутлақ чемпионликка эришган.

Маълумот учун, Кроуфорд профессионал фаолияти давомида 42 та жанг ўтказиб, барчасида ғалаба қозонган. Унинг 31 та ғалабаси нокаут билан якунланган.

Жарон Эннис эса сўнгги жангини 2026 йил июнь ойида ўтказиб, Хандер Заясни еттинчи раундда техник нокаутга учратган. Эннис ҳисобида 36 та ғалаба бор бўлиб, шуларнинг 32 тасини нокаут билан қўлга киритган. У ҳам профессионал фаолиятида ҳали мағлубиятга учрамаган.