Кореяда Шавкат Мирзиёев ва Зироат Мирзиёевага махсус совғалар берилди

Жанубий Корея Президенти Ли Чжэ Мён “Марказий Осиё – Жанубий Корея” саммити муносабати билан мамлакатга давлат ташрифи билан борган Ўзбекистон Президенти Шавкат Мирзиёевга қизил женьшень маҳсулотларини тортиқ этди. Бу ҳақда “SBS News” хабар берди.

Қайд этилишича, Корея Президенти Администрацияси жорий йилнинг 14 сентябрь куни тарқатилган матбуот релизида “Президент Ли Президент Мирзиёевга мустаҳкам соғлиқ ва фаровонлик тилаги сифатида Жанубий Кореянинг етакчи премиум-класс соғломлаштириш маҳсулоти бўлмиш қизил женьшень тортиқ этаётганини” маълум қилган.

Биринчи хоним Зироат Мирзиёева учун эса “унинг доимий қизиқишларини инобатга олган ҳолда” корейс анъанавий нафосатини ифодалашда кумушдан фойдаланилган оқ чинни буюм совға қилинган.

Бундан ташқари, Корея Президенти Администрацияси Шавкат Мирзиёевнинг давлат ташрифи дастурига Ўзбекистон маданиятини акс эттирувчи ҳамда Жанубий Кореянинг меҳмондўстлиги ва икки томонлама аҳил муносабатларини намойиш этувчи кўплаб “махсус эҳтиром” элементлари киритилганини эълон қилган. 

Сўлдаги Lotte World Tower медиа-фасадида Жанубий Корея ва Ўзбекистон давлат байроқлари акс эттирилади, Сеул Ҳукумат мажмуасининг ташқи электрон таблосида эса самимий меҳмондўстлик ифодаси сифатида корейс ва ўзбек тилларидаги қутлов хабарлари намойиш этилган.

Пешиндан сўнг бўлиб ўтган расмий кутиб олиш маросимида Президент Администрациясига кириш лаҳзасидан бошлаб 70 га яқин анъанавий фахрий қоровул ва ҳарбий оркестр аъзолари кузатиб борган, маршрут бўйлаб эса учта қўшин туридан иборат фахрий қоровулни ўз ичига олган 280 га яқин шахсий таркиб саф тортган.

Шунингдек, Шавкат Мирзиёевни кутиб олиш учун 30 га яқин болалардан иборат делегация, жумладан, Ўзбекистондан 10 нафар бола чиққан.

Икки мамлакатнинг турли соҳаларидан 50 га яқин вакиллари иштирок этган давлат қабул маросимида (банкетда) Шавкат Мирзиёев ҳамда икки халқнинг таомланиш маданияти ва маҳсулотлари ўртасидаги табиий уйғунликни ҳисобга олган ҳолда корейс миллий таомлари тортиқ этилган. Хусусан, менюдан денгиз маҳсулотларидан тайёрланган салатлар, гўшт (Ханву моли ва маринадланган қўй қовурғаси) ҳамда Ичеон гуручидан тайёрланган асосий таомлар ўрин олган. Десерт сифатида эса хурмодан тайёрланган ширинликлар ва анъанавий ичимликлар тортилган.

Эслатиб ўтамиз, Шавкат Мирзиёев Корея Республикаси Президенти Ли Чжэ Мённинг таклифига биноан 13-16 сентябрь кунлари давлат ташрифи билан ушбу мамлакатда бўлиб турибди.