Хивадаги “Қовун сайли” Гиннесс рекордлари китобига кирди

Жорий йилнинг 9 август куни Хивада ўтказилган “Қовун сайли” фестивалида 259 киши бир вақтнинг ўзида 10 дан ортиқ қовун навини татиб кўриб, жаҳон рекордини ўрнатди. Бу ҳақда Туризм қўмитаси хабар берди.

Қайд этилишича, 7-9 август кунлари Хиванинг “Ичан қалъа” тарихий мажмуаси ва “Арда Хива” сайёҳлик марказида “Қовун сайли” фестивали ўтказилган.

Фестиваль доирасида “Энг катта қовун дегустацияси” бўйича жаҳон рекорди ўрнатилган. Guinness World Records томонидан берилган расмий сертификатга кўра, бир вақтнинг ўзида 259 киши 10 дан ортиқ қовун навини татиб кўрган.

Рекордни тасдиқлаш жараёнида Guinness World Records ташкилотининг расмий ҳаками, Туркия ва Марказий Осиё бўйича вакили Шейда Субаши Гемижи иштирок этган.

Маълумотларга кўра, фестивалга жами 186 минг нафар меҳмон ташриф буюрган. Уларнинг 150 минг нафари маҳаллий, 36 минг нафари эса хорижий сайёҳларни ташкил этган.

Тадбир давомида Хоразм вилоятининг туманлари, фермер хўжаликлари ва бошқа иштирокчилар ўнлаб қовун навларини намойиш этган. Шунингдек, меҳмонлар турли қовунлардан татиб кўриш, ишлаб чиқарувчилар билан суҳбатлашиш ҳамда Хоразмнинг қишлоқ хўжалиги анъаналари билан танишиш имкониятига эга бўлган.

Фестиваль дастуридан санъаткорларнинг чиқишлари, маҳорат дарслари, кўргазмалар ва турли танловлар ҳам ўрин олган. Тадбирнинг ёпилиш маросимида россиялик хонанда МакSи́м ҳам саҳнага чиққан.

Фестиваль якунида танлов ғолиблари ҳам аниқланган. Учинчи ўринни Урганч давлат университети, “UzAuto”нинг Хоразм филиали ҳамда Автомобиль йўллари қўмитаси Хоразм вилояти бошқармаси эгаллаган. Иккинчи ўрин Хоразм вилояти Қишлоқ хўжалиги бошқармасига насиб этган.

Биринчи ўрин Янгиариқ тумани ҳокимлигига, бош соврин эса Хива шаҳар ҳокимлигига берилган.

Эслатиб ўтамиз, аввалроқ 20 минг нафар иштирокчи “Андижон полькаси”га рақсга тушиб Гиннес рекордлар китобига киритилгани ҳақида хабар берилган эди.