Хитойдан юборилган қарийб 25 кг наркотикни олаётганлар ушланди (видео)

Тошкент шаҳрида Хитойдан юборилган қарийб 25 кг наркотикни қабул қилиб олаётганлар қўлга тушди. Бу ҳақда Давлат хавфсизлик хизмати хабар берди.

Қайд этилишича, гиёҳвандлик воситаларининг ноқонуний айланмасига қарши курашиш йўналишида Давлат хавфсизлик хизмати ходимлари томонидан “Тошкент-АЭРО” ихтисослаштирилган божхона комплексининг Контрабандага қарши курашиш бўлими билан ҳамкорликда ўтказилган тезкор тадбирда хориждан олиб келинган катта миқдордаги кучли таъсир қилувчи модда тўхтатиб қолинган.

Хусусан, Хитой давлатидан юборилган жўнатмани курьерлик фаолияти билан шуғулланувчи фирманинг Тошкент шаҳридаги офисида қабул қилиб олган вақтида Юнусобод туманида яшовчи, 2000 йилда туғилган шахс ва унинг 1998 йилда Фарғона вилоятида туғилган, ҳозирда Чилонзор туманида вақтинча истиқомат қилувчи таниши ушланган.

Чет мамлакатдан юборилган жўнатма очиб кўрилганда, унинг ичида оқ рангли кукунсимон кўринишда бўлган 24 кг 974 гр “Прегабалин” кучли таъсир қилувчи моддаси борлиги аниқланган.

Билдирилишича, ҳозирда мазкур шахсларга нисбатан Жиноят кодексининг 246-моддаси 1-қисми билан жиноят иши қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.

Эслатиб ўтамиз, аввалроқ Тошкент вилоятининг Чирчиқ шаҳрида синтетик гиёҳвандлик воситаларини интернет орқали сотиш билан шуғулланган қизлар қўлга олингани ҳақида хабар берилган эди.