Кейн рицарлик унвонини олиши мумкин

Англия терма жамоаси сардори Ҳарри Кейн “Олтин тўп” совринини қўлга киритганидан сўнг, унга футболчилик фаолиятини якунлаганидан кейин рицарлик унвони бериш таклифи илгари сурилди. Бу ҳақда “The Guardian” нашри хабар берди.

Бу ташаббусни Лейбористлар партияси депутатлари қўллаб-қувватлаган. Кейн ушбу совринни 25 йил ичида қўлга киритган биринчи англиялик футболчи бўлди. Унинг муваффақияти сер Стэнли Мэттьюс тарихдаги илк “Олтин тўп”ни олганидан роппа-роса 70 йил ўтиб қайд этилди.

Лейбористлар партияси депутатлари Розена Аллин-Хан ва Клайв Эффорд Англия терма жамоаси сардорига фаолиятини якунлаганидан кейин рицарлик унвони бериш таклифини қўллаб-қувватлади.

Буюк Британия Бош вазири матбуот котиби ҳужумчининг ютуғини юқори баҳолади, бироқ унга рицарлик унвони берилиши мумкинлиги ҳақида изоҳ беришдан бош тортди.

“Бош вазир Ҳарри Кейнни “Олтин тўп”ни қўлга киритгани билан табрикламоқчи. 25 йил ичида ушбу совринни олган биринчи англиялик бўлиш – фавқулодда ютуқ. Буни ўз ватанида, сер Стэнли Мэттьюс тарихдаги илк совринни қўлга киритганидан 70 йил ўтиб амалга ошириши эса алоҳида рамзий маънога эга”, дейди матбуот котиби.

Кейнга рицарлик унвони берилиши ҳақидаги саволга жавоб берар экан, у футболчининг Англия футболига қўшган ҳиссаси катта эканини таъкидлади. Бироқ мукофотларни топшириш жараёнидан олдинроқ хулоса чиқармаслигини билдирди. Ҳарри Кейн ҳозирда Британ империяси ордени (MBE) соҳиби ҳисобланади.

Эслатиб ўтамиз, аввалроқ Дэвид Бекхэм рицарлик унвони билан тақдирланган эди.