Кам таъминланганларга ёрдам бериш тартиби соддалаштирилди

Эндиликда “Темир дафтар”га киритилган оилаларга бир марталик моддий ёрдам бир иш кунида туман (шаҳар) ҳокимлари қарорлари билан берилади.

Вазирлар Маҳкамаси томонидан жорий йилнинг 17 октябрь куни қабул қилинган 547-сонли қарори билан Ҳукуматнинг айрим ҳужжатларига ижтимоий аҳволи ва турмуш шароити оғир оилаларни қўллаб-қувватлаш тизимини соддалаштиришга қаратилган ўзгартириш ва қўшимчалар киритилди.

Маълум қилинишича, ушбу ҳужжат “Темир дафтар”га киритилган ижтимоий аҳволи оғир оилаларнинг муаммоларини тизимли равишда тезкор ҳал этиш бўйича самарали чора-тадбирларни белгилаш зарурати муносабати билан қабул қилинган.

"Халқ депутатлари туман (шаҳар) Кенгашларининг сессиялари оралиғидаги даврда кечиктириб бўлмайдиган ҳолларда, зудлик билан ёрдам кўрсатиш зарурияти юзага келганда – “Темир дафтар”га киритилган оилаларга бир марталик моддий ёрдам бир иш кунида туман (шаҳар) ҳокимлари қарори билан берилади", дейилади кам таъминланганларни ижтимоий қўллаб-қувватлаш бўйича вақтинчалик тартибда.

Маълум қилинишича, мазкур ҳужжат жорий йилнинг 20 октябридан кучга кирган.