“Ижрочилардан роса жаҳлим чиқди”. Сурхондарё ҳокими бузилган уй масаласида гапирди (видео)

Аввалроқ, Сурхондарё вилоятининг Денов туманида қишлоқ хўжалигига мўлжалланган ер майдонининг бир қисми ўзбошимчалик билан эгалланиб, у ерда қурилган уй-жой ва бошқа ноқонуний қурилмалар буздирилгани ҳақида хабар берилган эди. Шундан сўнг, Сурхондарё вилояти ҳокими Улуғбек Қосимов уй эгалари билан учрашиб, суҳбат ўтказди.

Суҳбат давомида фуқаронинг уйи қишлоқ хўжалигига мўлжалланган ер майдонида, тегишли ҳужжатларсиз қурилгани қайд этилган.

Маълум қилинишича, Денов тумани Ғалаба массиви, “Чуқурқишлоқ” маҳалласидаги қишлоқ хўжалигига мўлжалланган суғориладиган ер майдонининг 0,20 гектар қисми ўзбошимчалик билан эгалланган. Суд ҳужжатига кўра, уларни бузиш ҳамда ер майдонини асл ҳолатига келтириш белгиланган.

Ҳоким фуқаро билан суҳбатда қурилиш тегишли ҳужжатларсиз амалга оширилганини таъкидлаган.

“Сизнинг хатонгиз ҳужжат қилмасдан қурилиш қилганингиз. Қонунни бузганингиз, бу қонун бузилса, ҳеч ким ҳеч кимни қўллай олмайди. Мен бугун кўриб, тўғриси роса мана бу ижрочилардан ҳам жаҳлим чиқди. Лекин бу ноинсофлар бироз маслаҳат қилганда, биз сизга нариги томондан уй қилиб, кейин буни бузиб ташлардик“, деган Сурхондарё вилояти ҳокими.

Шунингдек, ҳоким суғориладиган ер майдонининг тоифасини ўзгартириш бўйича ваколат масаласига ҳам тўхталган.

“Суғориладиган жойнинг тоифасини ўзгартиришга ҳозир вилоят ҳокимининг ҳам ваколати йўқ“, дея қўшимча қилган ҳоким.

Шу билан бирга, суҳбат давомида ҳоким фуқаронинг уй-жой муаммосини қонуний йўл билан ҳал этишга ёрдам берилишини айтган. Жумладан, аукцион орқали қонуний ер майдони ажратиш ва янги турар жой қуриб бериш масаласи кўриб чиқилишини маълум қилган.

“Сизга бир қонуний жой топамиз, аукциондан ўзингизга қиламиз, шошилмасдан. 10-15 кун, 20 кун кетар, бир ой кетар. Чиройли қилиб, битта ватан қилиб, сизда ҳам эртага эгалик ҳуқуқи бўладиган, бир мерос қилиб қолдирадиган, фарзандлар билан бемалол яшайдиган қилсак бўладими? Ёрдам берамиз. Байрамгача, қўл ташлашиб, каттароқ қурувчи қўйиб, ишларни тезлаштирамиз. Уйингиз бузилиб кетгани ҳам билинмайдиган қилиб, тезроқ тиклаб берамиз“, деган вилоят ҳокими.

Суҳбат давомида фуқаронинг турмуш шароити, оиласи ва соғлиғи билан боғлиқ масалалар ҳам муҳокама қилинган. Улуғбек Қосимов фуқаронинг турмуш ўртоғини даволатиш, фарзандлари билан боғлиқ масалаларда ҳам ёрдам кўрсатилишини айтган.