Италия Мудофаа вазири яқинда ишдан бўшатилган Федоровни ўзига маслаҳатчи бўлишга чақирди

Италия Мудофаа вазири Гуидо Крозетто Украинанинг лавозимидан озод этилган собиқ мудофаа вазири Михайло Федоровга ўзининг маслаҳатчиси сифатида ишлашни таклиф қилди. Бу ҳақда у “la Repubblica” газетасига берган интервьюсида маълум қилди.

Қайд этилишича, Гуидо Крозетто Украинанинг яқинда лавозимидан четлатилган собиқ мавқеидоши Михайло Федоровга Италияда ўз маслаҳатчиси сифатида ишлашни таклиф қилганини айтган.

“У лавозимидан озод этилганининг эртаси куни қўнғироқ қилиб: “Қачон Римга келиб, мен билан маслаҳатчи сифатида ишлашни хоҳлайсан?” деб сўрадим”, деган Крозетто газетага берган интервьюсида.

Федоровнинг қандай жавоб қайтаргани ҳақидаги саволга Крозетто у “ҳаяжонланганини” ва бу таклифни “ҳурмат ва дўстлик ифодаси” сифатида қабул қилганини айтган.

Крозетто Федоровни ҳарбий инновациялар соҳасидаги етакчи шахс сифатида мақтаб, у “жанговар майдондаги ўйин қоидаларини бутунлай қайта ёзган инсонлардан бири” эканини таъкидлаган. Унинг айтишича, Федоров Украинага Россия босқинига қарши туриш ва кейинчалик янги технологиялар орқали жанговар амалиётларни ўзгартириш ҳисобига ташаббусни қўлга олишда ёрдам берган.

Маълумот учун, 35 ёшли, технологияларга ихтисослашган ислоҳотчи сифатида танилган Михайло Федоров Украинада дронлар имкониятларини ошириш ва мудофаа соҳасида ислоҳотларни илгари суришдаги хизмати учун қўллаб-қувватловчилар томонидан юқори баҳоланган. 

Эслатиб ўтамиз, Федоров шу ойда мудофаа вазири лавозимидан озод этилганди ва бу қарор Украинада уруш давридаги камсонли норозилик намойишларига сабаб бўлганди.

Украина Президенти Владимир Зеленский унга бошқа лавозимларни таклиф қилган, аммо Федоров аввалги вазифасидан бошқа ҳеч қандай давлат лавозимини қабул қилмаслигини билдирган.