Italiya Mudofaa vaziri yaqinda ishdan bo‘shatilgan Fedorovni o‘ziga maslahatchi bo‘lishga chaqirdi

Italiya Mudofaa vaziri Guido Krozetto Ukrainaning lavozimidan ozod etilgan sobiq mudofaa vaziri Mixaylo Fedorovga o‘zining maslahatchisi sifatida ishlashni taklif qildi. Bu haqda u “la Repubblica” gazetasiga bergan intervyusida ma’lum qildi.

Qayd etilishicha, Guido Krozetto Ukrainaning yaqinda lavozimidan chetlatilgan sobiq mavqeidoshi Mixaylo Fedorovga Italiyada o‘z maslahatchisi sifatida ishlashni taklif qilganini aytgan.

“U lavozimidan ozod etilganining ertasi kuni qo‘ng‘iroq qilib: “Qachon Rimga kelib, men bilan maslahatchi sifatida ishlashni xohlaysan?” deb so‘radim”, degan Krozetto gazetaga bergan intervyusida.

Fedorovning qanday javob qaytargani haqidagi savolga Krozetto u “hayajonlanganini” va bu taklifni “hurmat va do‘stlik ifodasi” sifatida qabul qilganini aytgan.

Krozetto Fedorovni harbiy innovatsiyalar sohasidagi yetakchi shaxs sifatida maqtab, u “jangovar maydondagi o‘yin qoidalarini butunlay qayta yozgan insonlardan biri” ekanini ta’kidlagan. Uning aytishicha, Fedorov Ukrainaga Rossiya bosqiniga qarshi turish va keyinchalik yangi texnologiyalar orqali jangovar amaliyotlarni o‘zgartirish hisobiga tashabbusni qo‘lga olishda yordam bergan.

Ma’lumot uchun, 35 yoshli, texnologiyalarga ixtisoslashgan islohotchi sifatida tanilgan Mixaylo Fedorov Ukrainada dronlar imkoniyatlarini oshirish va mudofaa sohasida islohotlarni ilgari surishdagi xizmati uchun qo‘llab-quvvatlovchilar tomonidan yuqori baholangan. 

Eslatib o‘tamiz, Fedorov shu oyda mudofaa vaziri lavozimidan ozod etilgandi va bu qaror Ukrainada urush davridagi kamsonli norozilik namoyishlariga sabab bo‘lgandi.

Ukraina Prezidenti Vladimir Zelenskiy unga boshqa lavozimlarni taklif qilgan, ammo Fedorov avvalgi vazifasidan boshqa hech qanday davlat lavozimini qabul qilmasligini bildirgan.