Инфантинони тергов қилиш талаби билан оммавий петиция бошланди

Халқаро футбол федерацияси (FIFA) президенти Жанни Инфантинони тергов қилишни талаб қилувчи петицияга 100 мингдан ортиқ киши имзо чекди. Бу ҳақда “FairSquare” инсон ҳуқуқлари ташкилоти маълумотларига таяниб, “Reuters” агентлиги хабар берди.

Жорий йилнинг август ойида “FairSquare” FIFA’нинг Этика қўмитасига Инфантинонинг фаолияти юзасидан шикоят билан мурожаат қилган. Ташкилот унинг сиёсий бетарафлик тамойилини бузгани, ваколатларини суиистеъмол қилгани ва АҚШ Президенти Дональд Трамп билан муносабатлари орқали FIFA’нинг этика кодекси талабларига зид ҳаракат қилганини таъкидламоқда.

“FairSquare” аввалроқ Халқаро Олимпия қўмитасига ҳам шикоят билан мурожаат қилган эди. Бироқ ХОҚ июль ойида ушбу масала унинг Этика комиссияси ваколатига кирмаслигини билдириб, шикоятни кўриб чиқишдан бош тортган.

Бундан ташқари, Инфантино раҳбарияти даврида FIFA Forward Enterprise номли янги тузилма ташкил этиш режаси ҳам жиддий танқидларга сабаб бўлган. Ушбу лойиҳа FIFA мусобақаларининг, жумладан Жаҳон чемпионатининг тижорий ҳуқуқларига хусусий инвесторларни жалб этишни назарда тутган ва тахминан 4,2 миллиард доллар маблағ жалб қилиши мумкин эди. Бироқ кучли қаршиликлар ортидан ташаббус 31 июль куни бекор қилинди.

Мазкур режа сабабли UEFA, ОФК ва CONCACAF Инфантинонинг истеъфога чиқишини талаб қилди. Шу билан бирга, Африка ва Жанубий Америка футбол конфедерациялари FIFA президентини қўллаб-қувватлашда давом этмоқда.

Маълумот учун, 56 ёшли Инфантино 2016 йил февраль ойида FIFA президенти этиб сайланган. У кейинчалик икки марта рақобатсиз қайта сайланди. Инфантино 2027 йил март ойида бўлиб ўтадиган сайловда тўртинчи муддатга номзодини қўйиш ниятида эканини тасдиқлаган. Номзодларни тақдим этишнинг сўнгги муддати жорий йилнинг 18 ноябрь ҳисобланади. Ҳозирча унга расман рақиб бўладиган бошқа номзод эълон қилинмаган.