Инфантино Трампнинг “битта телефони билан” Балогунни оқлагани маълум бўлди

FIFA президенти Жанни Инфантино АҚШ Президенти Дональд Трампга Америка терма жамоаси ҳужумчиси Фоларин Балогуннинг Жаҳон чемпионатидан четлатилиши билан боғлиқ вазиятни “битта телефон қўнғироғи” билан ҳал қилган. Бу ҳақда “The New York Post” нашри хабар берди.

Нашр маълумотлари тўртта манбага асосланган бўлиб, ҳозирча расман тасдиқланмаган. Газетанинг ёзишича, жорий йилнинг 1 июль куни бўлиб ўтган суҳбат давомида Инфантино Трампга ушбу ҳолатни “кўриб чиқишини” айтган. Шундан сўнг масала “битта телефон қўнғироғи” орқали ҳал қилингани таъкидланмоқда.

Балогун Босния ва Герцеговинага қарши 1/16 финал учрашувида қизил карточка олган ва умумий қоидаларга кўра, кейинги ўйинни ўтказиб юбориши керак эди.

Кейинчалик FIFA Интизом қўмитаси қизил карточкани ўз кучида қолдирди, аммо футболчининг дисквалификациясини бир йиллик синов муддати билан тўхтатиб туришга қарор қилди. Бу эса ҳужумчига АҚШ терма жамоасининг Белгияга қарши учрашувида иштирок этиш имконини берди. Бироқ шунга қарамай Америка терма жамоаси мазкур баҳсда 1:4 ҳисобида мағлуб бўлганди.

Трамп Инфантинога қўнғироқ қилиб, футболчининг четлатилиши билан боғлиқ вазиятни қайта кўриб чиқишни сўраганини тасдиқлаган. Бироқ у FIFA’га қандай қарор қабул қилиш бўйича кўрсатма бермаганини айтган.

Инфантино ҳам АҚШ Президентидан қўнғироқ бўлганини тасдиқлаган, аммо мазкур масала FIFA’нинг мустақил суд органлари ваколатига киришини таъкидлаган.