Инфантино обрўсини кўтариш учун 2,7 миллион евро сарфлайди

FIFA Лондонда жойлашган “Ten Toes Media” маркетинг агентлиги билан бир неча миллион фунт стерлинглик шартнома имзолади. Унинг асосий вазифаларидан бири ташкилот ва унинг президенти Жанни Инфантинонинг обрўсини ҳимоя қилишдан иборат. Бу ҳақда “The Times” нашри хабар берди.

Манбага кўра, келишув 2025 йил март ойида имзоланган ва 22 ойга мўлжалланган. Шартнома 2026 йил декабрь ойида ўз ниҳоясига етади. Келишув қиймати 2,3 миллион фунт стерлинг бўлиб, бу тахминан 2,7 миллион еврони ташкил этади.

Ҳужжатга кўра, “Ten Toes Media” FIFA’га Instagram, Facebook, X ва LinkedIn каби ижтимоий тармоқлардаги расмий саҳифаларини бошқаришда ёрдам беради. Агентликнинг асосий вазифалари FIFA ва Инфантинонинг обрўсини ҳимоя қилиш, ташкилотнинг ижтимоий тармоқлардаги кўринишини ошириш, шунингдек, президентнинг қарашларига мос коммуникация стратегиясини ишлаб чиқиш учун таҳлил ва зарур воситаларни тақдим этишдан иборат.

Шартнома ҳақидаги маълумотлар Жанни Инфантино фаолиятига нисбатан танқидлар кучайиб бораётган бир пайтда ошкор бўлди. Танқидларга сабаб бўлган масалалардан бири Инфантинонинг келажакдаги Жаҳон чемпионатлари ва бошқа FIFA турнирларининг тижорий ҳуқуқларига хусусий инвесторларни жалб қилиш таклифи бўлди. Бироқ ушбу лойиҳа футбол жамоатчилиги ва спорт соҳаси вакилларининг жиддий қаршилигидан сўнг бекор қилинди.

Маълумот учун, 2027 йил март ойида FIFA президенти сайлови бўлиб ўтиши режалаштирилган. Инфантинонинг мазкур сайловда яна бир муддатга ўз номзодини қўйиши кутилмоқда.