ИИББга ишга киритиб қўйиш учун 5 минг доллар олган шахс ушланди 

Тошкент вилоятидаги Ангрен ва Олмалиқ шаҳарларида пора эвазига ишга киритиб қўйиш ва ўқимасдан туриб ҳайдовчилик гувоҳномаси олиб бериш бўйича фирибгарлик ҳолати фош этилди. Бу ҳақда Давлат хавфсизлик хизмати хабар берди.

Қайд этилишича, Ангрен шаҳрида яшовчи, 1974 йилда туғилган фуқаро ҳуқуқ-тартибот идораларидаги мансабдор танишлари орқали бошқа бир фуқарони Тошкент вилояти Ички ишлар Бош бошқармасига ишга киритиб қўйиш эвазига 5000 АҚШ доллари олган вақтида ашёвий далил билан ушланган.

Бошқа ҳолатда эса Олмалиқ шаҳрида жойлашган хусусий автомактаб директорининг ўринбосари маҳаллий фуқарога ўқув курсларига қатнашмасдан, ҳайдовчилик гувоҳномасини олиб бериш эвазига 3000 АҚШ доллари олган вақтида ушланган. Таъкидланишича, автомактаб директори ўринбосари муқаддам Жиноят Кодексининг 166- (талончилик) ва 277- (безорилик) моддалари билан судланган.

“Ҳозирда ҳар иккала қонунбузарга нисбатан Жиноят Кодексининг 168-моддаси 2-қисми “а” банди ва 28,211-моддаси 1-қисми билан жиноят ишлари қўзғатилган”, дейилади хабарда. 

Эслатиб ўтамиз, аввалроқ Қашқадарё вилоятида ўқишга киритиб қўйиш билан боғлиқ фирибгарлик ҳолати фош этилганди.

Улканбаева Райҳона