Гуллунинг қизи онасини ўлдиришни режалаштирганмиди? Янги кадрлар пайдо бўлди (видео)

Туркиялик хонанда Гуллунинг ўлими бўйича терговда янги видеокадрлар пайдо бўлди. Унда хонанданинг қизи Туғян Улкем Гултер воқеадан кейин полиция ходимлари билан бирга уйга кириб келгани ва ваҳима ичида онасининг аҳволи ҳақида қайта-қайта сўрагани акс этган. Бу ҳақда “Haberler” хабар берди.

“Гуллу” номи билан танилган 52 ёшли Гул Тут 2025 йилнинг 26 сентябрь куни Ялова вилояти Чинаржик туманидаги уйининг 6-қаватидан йиқилиб, вафот этганди. Ўша вақтда у қизи ва унинг дугонаси билан бирга бўлган. Дастлаб ҳодиса бахтсиз воқеа сифатида баҳоланган. Хонанданинг ўғли ҳам ижтимоий тармоқларда тарқалган унинг ўз жонига қасд қилгани ҳақидаги хабарларни рад этиб, онаси бахтсиз ҳодиса оқибатида вафот этганини билдирган.

Бироқ кейинчалик иш бўйича тергов давом эттирилиб, хонанданинг қизи Туғян Улкем Гултер ва унинг дўсти Султон Нурўғли гумонланувчига айланган. Гултер “қасддан одам ўлдириш” айблови билан ҳибсга олинган, Султон Нурўғлига эса уй қамоғи тайинланганди.

Тергов маълумотларига кўра, ҳодиса содир бўлган кечаси Туғян дўсти Султон Нурўғлидан онаси яхши кўрадиган “Малката” номли лўли куйини қўйишни сўраган. Гуллу ҳаммомдан чиққач, мусиқа овозини эшитиб, қизининг хонасига кирган. У ерда бирга қўшиқ куйлаб, рақсга тушган. Прокуратура қўшиқ Гуллуни айнан шу хонага олиб кириш учун атайлаб қўйилган, деб ҳисоблаган.

Шунингдек, Истанбул техника университети томонидан ҳодиса вақтида ёзиб олинган камера аудиоёзувлари таҳлил қилинган. Эксперт хулосасида Гуллу йиқилиши олдидан ёш аёл овозида масхаралаш ва қувноқ оҳангда “Хўш, кўришамиз” деган гап эшитилгани қайд этилган. Прокуратура бу сўзларни Туғян айтган, деган хулосага келган. Айблов хулосасида шундан кейин у онасини икки қўли билан сонларидан ушлаб, оёқларини ердан узган ва деразадан улоқтиргани айтилган.

Ҳодиса вақтида хонада бўлган Султон Нурўғли дастлаб Гуллу маст бўлгани ва деразадан ўзи йиқилгани ҳақида кўрсатма берган. Кейинчалик эса воқеа бошқача содир бўлганини айтган. Унинг кейинги кўрсатмаларида Туғян онасини деразадан улоқтиргани айтилган. Шунингдек, унинг адвокати билан телефон орқали ёзиб олинган суҳбатида гувоҳ Туғян жазодан қутулиб қолишини истамаслигини, прокуратурага бориб ҳақиқатни айтишини билдиргани аниқланган. Прокуратура ушбу аудиоёзув гувоҳнинг кейинчалик берган кўрсатмаларини тасдиқлайди, деб ҳисоблаган.

Суд-тиббий ва токсикологик экспертизанинг натижаларига кўра, Гуллунинг қонида 3,53 промилле алкогол аниқланган. У қабул қилган дорилар заҳарли миқдорда бўлмаган. Шунингдек, унинг заҳарланганини кўрсатувчи тиббий далиллар топилмаган. Хонанда 18 метр баландликдан бетон юзага тушгани ва бош суяги, умуртқа поғонаси, ички аъзолари ҳамда йирик қон томирлари жароҳатлангани оқибатида ички қон кетишидан вафот этгани қайд этилган.

Ялова Бош прокуратураси 11 ой давом этган терговни якунлаган. Шунингдек, прокуратура хабарлар, гувоҳларнинг кўрсатмалари, аудиокўрсатмалар транскрипцияси, экспертиза хулосалари ва ҳодисадан кейинги хатти-ҳаракатларни биргаликда баҳолаб, Туғян Улкем Гултер онасини ўлдиришни олдиндан режалаштирган, деган хулосага келган. Айблов хулосасида ҳибсда сақланаётган гумонланувчига “тўғри насабдаги қариндошини қасддан ўлдириш” айблови билан афв этиш имкониятисиз умрбод қамоқ жазоси бериш сўралган.

Султон Нурўғлига эса “ёлғон кўрсатма бериш” айблови билан 4 йилгача қамоқ жазоси сўралган. Суд жараёни яқин кунларда бошланиши кутилмоқда.

Энди эълон қилинган янги кадрларда эса Туғян Улкем Гултер полиция ходимлари билан бирга хонадонга кириб келаётгани кўринади. Кейинги тасвирларда у ваҳима ичида полициячилардан бир неча бор: “Онам нега бундай гапиряпти, онам яхшими?” деб сўраган. Кадрларда Султон Нурўғли ҳам акс этган.