Учтепадаги ёнғинда вафот этган аёл қасддан ўлдирилгани маълум бўлди

Тошкент шаҳрининг Учтепа туманида хонадон ёнғинида ҳалок бўлган аёл яшаган уйга қасддан ўт қўйилгани аниқланди. Ҳодиса жойида бир-бирига боғлиқ бўлмаган учта ёнғин ўчоғи аниқланган. Бу ҳақда QALAMPIR.UZ сўровига жавобан Бош Прокуратура матбуот котиби Ҳаёт Шамсутдинов маълум қилди.

Қайд этилишича, жорий йилнинг 24 октябрь куни соат 02:00 ларда тумандаги хонадонлардан бирида ёнғин содир бўлган. Ёнғин жойида 2000 йилда туғилган аёлнинг жасади топилган. Шунингдек, унинг елкасидан сон қисмигача бўлган жойларида термик жароҳатлар аниқланган.

Ҳодиса жойини кўздан кечириш давомида ошхона, ётоқхона ва меҳмонхонада бир-бирига боғлиқ бўлмаган учта ёнғин ўчоғи борлиги аниқланган. Шунингдек, хонадонга қасддан ўт қўйилган бўлиши мумкинлигини кўрсатувчи аломатлар ҳам қайд этилган.

Мазкур ҳолат юзасидан 24 октябрь куни Учтепа тумани прокуратураси томонидан Жиноят кодексининг 97-моддаси 1-қисми (Қасддан одам ўлдириш) билан жиноят иши қўзғатилган.

Ҳозирда дастлабки тергов ҳаракатлари олиб борилмоқда. Тергов натижаларига кўра, қонуний қарор қабул қилиниши ва қўшимча маълумот берилиши билдирилган.

Эслатиб ўтамиз, ушбу ёнғин сабабли ҳодиса жойига чақирилган қутқарувчилар автомобили кўп қаватли уйлар олдидаги йўлларда машиналарнинг тартибсиз қўйиб ташлангани сабабли юришга қийналгани ҳақида хабар берилган эди.