Гуллунинг ўлимида ўзининг қизи айбланиб, ҳибсга олинди

Аввалроқ, Гуллу тахаллуси билан танилган туркиялик машҳур хонанда Гул Тут Ялова вилоятининг Чинаржик туманидаги уйининг балконидан йиқилиб, вафот этгани ҳақида хабар берилган эди. Мазкур иш доирасида айбланувчи сифатида унинг қизи ҳибсга олинди. Бу ҳақда бугун, 13 декабрь куни “Akdeniz Gercek” хабар берди.

Нашрнинг ёзишича, Яловада Республика Бош прокуратураси томонидан олиб борилаётган тергов доирасида “қасддан ўлдириш” айби билан қўлга олинган Гуллунинг қизи Туғян Улкем Гултер ҳамда воқеа куни хонада бўлган унинг дўсти Султан Нур ўглининг суд биносидаги процессуал ишлари якунланган.

Гултернинг дўсти Султан Нур ўглининг прокуратурага берган кўрсатмаларидан сўнг, Гултер “қасддан одам ўлдириш” айблови билан ҳибсга олинган. Султан Нур ўглининг ўзи эса уй қамоғига юборилган. Тергов доирасида қўлга олинган Ориф ўғли ва яна 2 киши эса прокуратурадаги кўрсатмаларидан сўнг озод қилинган.

Шунингдек, Адлия биносига юборилишидан олдин тиббий текширув учун шифохонага олиб борилган Гултер шифохона олдида уни кутаётган гуруҳ томонидан норозилик билдириши ортидан тўғридан тўғри Адлияга олиб кетилган. Ялова Адлия саройи олдида кутаётган одамлар ҳам Гултерга қарши шиорлар айтиб, норозилик билдирган.

Эслатиб ўтамиз, хонанда Гул Тут жорий йилнинг 26 сентябрь куни Ялова вилоятининг Чинаржик туманидаги Ҳарманлар маҳалласи, Вали Аки кўчасидаги 6 қаватли уйнинг ёпиқ томли террасидаги деразадан номаълум сабабга кўра йиқилиб, вафот этган эди. Тутнинг дафн маросими Истанбулда ўтказилган.

Республика Бош прокуратураси воқеа юзасидан тергов бошлаган. Маълум бўлишича, Тутнинг қизи Гултер ва воқеа содир бўлган куни хонада бўлган дўсти Султан Нур бир муддат техник назорат остида бўлган. Улар чет элга кетишга тайёргарлик кўраётганда Истанбулда қўлга олиниб, Яловага олиб борилган. Султан Нурнинг отаси Ориф ўғли ва яна 2 киши ҳам қўлга олинган. Кейинроқ эса улар қўйиб юборилган.