Google энг оммабоп эможини эълон қилди

Йиғлаётган юз кўринишидаги эможи 2025 йилда дунёдаги энг оммабоп эможига айланди. Бу ҳақда Google маълумотларига таяниб, “The New York Times” нашри хабар берди. 

Қайд этилишича, статистика Android-смартфонлар учун мўлжалланган Gboard клавиатураси орқали юборилган 665 миллионта эможининг аноним танланмаси асосида тўпланган.

Топ-3 таликка йиғлаётган эможиларнинг учта тури кирган. Биринчи ўринни кўз ёшлари “шалоладек” оқаётган юз тасвири эгаллаган. Барча эможиларнинг 6 фоиздан ортиғи ушбу эможи ҳиссасига тўғри келади.

Кейинги ўринда кулгидан йиғлаётган ва ён томонга эгилган юз эможиси бормоқда. Кучли кулгидан кўзидан ёш чиқаётган классик юз тасвири эса кучлик учликни якунлаб беради.

Мутахассислар, шунингдек, Reddit сайтининг ўсмирларга бағишланган r/teenagers сабреддитидаги эможилар оммабоплигини ҳам таҳлил қилган. 2021 йилнинг охирига келиб, йиғлаётган эможи пешқадамликни бош суяги тасвирига бой берган. Ёшлар ундан “кулавериб ўлдим” маъносида фойдаланади. Бироқ икки йил ўтиб, унинг ишлатилиши кескин камайган.

“Баъзи ёшлар умуман эможилардан воз кечмоқда – бунинг ўрнига улар стикерлардан фойдаланишмоқда. Стикерлар фотосуратлар ёки фақат муайян мулоқот доирасидагиларга тушунарли бўлган мем ва ҳазиллар асосида шахсийлаштирилган тасвирларни яратишга имкон беради. Агар эможилар умумий визуал тилга айланган бўлса, стикерлар бунинг аксини – фақат оила аъзолари ёки яқин дўстларгагина тушунарли бўлган ички ҳазиллар тилини таклиф этмоқда”, деб қайд этади “The New York Times”.

Эслатиб ўтамиз, аввалроқ халқаро ҳакамлар ҳайъати илк бор дунёдаги энг гўзал сўзни танлаганди. Бу Янги Зеландиянинг туб аҳолиси бўлмиш маори халқи тилидаги “кайтиакитанга” (kaitiakitanga) сўзи бўлиб, у ўзбек ва бошқа кўплаб тилларда аниқ муқобилга эга эмас.