Google ўзининг энг яхши нейротармоқларини пулли қилади

Google шахсий аккаунт фойдаланувчилари учун Gemini моделларидан фойдаланиш шартларини ўзгартирмоқда. Жорий йил 9 октябрдан бошлаб Google AI обунасига эга бўлмаган фойдаланувчилар Gemini Flash ва Gemini Pro моделларига кириш ҳуқуқини йўқотади, бепул тариф эса фақат Gemini Flash-Lite модели билан чекланади. Бу ҳақда “WebHill” хабар берди.

Тахминан уч ой олдин Google баъзи фойдаланувчиларга уч ойга 75 фоизгача чегирма билан Plus обунасини таклиф қилган эди. Ушбу таклиф бўйича яхшиланган диск майдони, Gemini’дан кенгайтирилган фойдаланиш ва энг муҳими – Gemini Pro моделидан фойдаланиш имкониятини олиш мумкин эди. Аммо тез орада Plus обунаси Pro моделига кириш ҳуқуқидан маҳрум бўлади. Бундан ташқари, чекловлар бепул тарифга ҳам таъсир қилади.

“Биз сиз фойдаланаётган ҳисоблаш ресурслари ҳажмини ҳисобга олишни бошлаймиз. У сўровларнинг мураккаблиги, танланган функциялар ва Gemini билан суҳбатлар давомийлигига боғлиқ. Лимитлар ҳафталик квотага етгунингизга қадар ҳар беш соатда янгиланиб туради. Google AI пуллик обунасига эга фойдаланувчиларда лимитлар юқорироқ. Агар сиз илғор моделлар ва функциялардан фойдалансангиз, ресурслар тезроқ сарфланади, масалан, медиа-контент, тасвирлар, видео ва мусиқа яратиш, Deep Research, Pro модели, кенгайтирилган фикрлаш ва Deep Think”, дея тушунтириш берди корпорация қўллаб-қувватлаш хизмати.

Обунасиз фойдаланувчилар учун ўзгариш энг сезиларли бўлади. 9 октябргача улар учун Flash-Lite, Flash ва Pro мавжуд, ушбу санадан сўнг эса фақат Flash-Lite қолади.

Google AI Plus обуначилари ҳам мавжуд моделлардан бирини йўқотади. Ўзгаришдан сўнг улар Flash-Lite ва Flash’дан фойдаланишлари мумкин бўлади, аммо Gemini Pro янада қимматроқ бўлган AI Pro ва AI Ultra тарифлари таркибига ўтади. Google’нинг маълум қилишича, AI Plus фойдаланувчилари ўзгариш уларнинг аккаунти учун айнан қачон кучга кириши ҳақида алоҳида электрон хат олади.

Google AI Pro обуначилари учун нафақат кириш ҳуқуқини чеклаш, балки янги афзаллик ҳам кўзда тутилган. Ўзгаришдан сўнг улар илгари фақат AI Ultra фойдаланувчилари учун мавжуд бўлган Deep Think функциясига кириш имконига эга бўлади. Ушбу функция “максимал параллель фикрлаш” учун мўлжалланган.

AI Ultra шу билан бирга Flash-Lite, Flash, Pro ва Deep Think каби аввалги имкониятлар тўпламини сақлаб қолади.

Компаниянинг билдиришича, мавжуд бўлган ҳар бир модел учун юклама даражасини танлаш мумкин: паст, ўрта ёки юқори. Даража қанчалик юқори бўлса, модел топшириқларни шунчалик яхши уддалайди ва сўровларга батафсилроқ жавоб беради, лекин лимит ҳам шунчалик тез тугайди.

Эслатиб ўтамиз, аввалроқ Google’нинг Япониядаги бўлими муҳандислари механик клавиатурани янгича талқин қилиб, уни конвейер тасмаси билан жиҳозлагани ҳақида хабар берилган эди.