Францияда ўқувчилар исёни: 2 мингга яқин одам ушланди, мактаблар ёпилди (фото)

Францияда мактаблардаги шароит ва таълим учун ажратилаётган маблағлардан норози ўқувчиларнинг намойишлари кучайиб, полиция билан тўқнашувлар юз берди. Бу ҳақда “Reuters” хабар берди.

Қайд этилишича, бугун, 2 октябрь куни мамлакатнинг бир қатор шаҳарларида намойишлар давом этган. Страсбургда полиция кўздан ёш оқизувчи газ ишлатган, Марселда намойишчилар полиция сафларига пиротехника воситаларини отган, Ренн шаҳрида эса чиқинди қутиларига ўт қўйилган.

Намойишлар дастлаб Париж ҳудудида бошланган бўлса, кейинчалик мамлакат бўйлаб тарқалган. Адлия вазири Жералд Дарманеннинг маълум қилишича, норозиликлар бошланганидан бери 2 мингга яқин киши ҳибсга олинган. Уларнинг аксарияти ўсмирлар бўлган. Шунингдек, тартибсизликлар сабаб 400 га яқин мактаб 2 октябрь куни фаолиятини тўхтатган. Бу мамлакатдаги ўрта мактабларнинг қарийб ўндан бир қисмини ташкил этади.

Ўқувчилар синфларнинг ҳаддан ташқари гавжумлиги, ўқитувчилар етишмаслиги ва мактаб биноларининг таъмирталаб ҳолатидан норозилик билдирмоқда. Улар таълим тизимига кўпроқ маблағ ажратилиши, ўқитувчилар, жумладан, ўринбосар педагоглар сонини кўпайтириш ҳамда ўқиш шароитларини яхшилашни талаб қилмоқда.

Франция ҳукумати томонидан тақдим этилган 2027 йилги бюджет лойиҳасида таълим соҳаси учун харажатларни 1,7 фоизга ошириш кўзда тутилган. Бироқ бу кўрсаткич инфляция даражасидан паст.

Намойишлар вақтида полиция томонидан куч ишлатилгани юзасидан ҳам эътирозлар билдирилган. Ўқувчилар ва ҳуқуқ фаоллари вояга етмаганларга нисбатан таёқ, кўздан ёш оқизувчи газ ва бошқа махсус воситалар қўлланганини танқид қилган. Франция Ички ишлар вазирлиги полициянинг намойишчилар билан муомаласи бўйича учта тергов бошланганини маълум қилган.

Адлия вазири ота-оналар фарзандлари томонидан етказилган моддий зарарни қоплашга мажбур қилиниши кераклигини айтган. Таълим вазири Эдуард Жефре эса ота-оналарни фарзандларини кўчалардаги намойишларда қатнашишдан қайтаришга чақирган.

Намойишлар қўшни Бельгияга ҳам тарқалиш аломатларини кўрсатган. Льеж шаҳрида айрим мактаб ўқувчилари 1 октябрь куни норозилик намойишларини бошлаган, 2 октябрь куни эса шаҳардаги мактаблар ёпилган.

Эслатиб ўтамиз, аввалроқ Францияда ўқувчилар намойишлари вақтида камида икки мактабда ёнғин чиққани ҳақида хабар берилган эди.