Францияда Dior, Louis Vuitton ва Celine дўконлари талон-торож қилинди (видео)

Францияда оммавий намойишлар пайтида Dior, Louis Vuitton, Hermès ва бошқа машҳур брендлар дўконларига ҳужум қилиниб, товарлар ўғирлаб кетилди. Бу ҳақда “LiFO” нашри хабар берди.

Қайд этилишича, кеча, 17 октябрь куни мамлакатнинг бир нечта шаҳрида ҳукуматга қарши оммавий намойишлар бўлиб ўтган. Айрим гуруҳлар вазиятдан фойдаланиб, турли савдо нуқталарига бостириб кирган ва товарларни олиб кетган. Ҳужумлар нафақат қимматбаҳо буюмлар дўконлари, балки техника дўконлари, нонвойхоналар ва супермаркетларда ҳам кузатилган.

Парижда CELINE, Dior, Burberry ва Louis Vuitton брендларига тегишли дўконларга зарар етказилган. Республика майдони яқинида косметика дўконининг витринаси синдирилиб, ичкаридаги гўзаллик маҳсулотлари ташқарида тўпланган одамларга улоқтирилган.

Шунингдек, телекоммуникация дўконига бостириб кирган шахслар у ердаги телефонларни ташқарига отган. Республика майдонидаги марказий ёдгорлик турли ёзувлар билан қопланган, майдон тошларининг бир қисми кўчирилган. “La Barrique” барида эса ёнғин чиққан.

Яқин атрофдаги супермаркетга кирган ёшлар спиртли ичимликлар ва газланган ичимликларни олиб чиқиб, уларни полиция ходимларига қарата отган.

Тартибсизликлар Марсел, Лилль ва Ницца шаҳарларида ҳам кузатилган. Марселда Hermès дўкони, заргарлик буюмлари, кийим-кечак, косметика ва маиший техника сотиладиган савдо нуқталарига зарар етказилган. Шунингдек, пойабзал дўконида чиққан ёнғинни ўчириш учун ўт ўчирувчилар жалб қилинган.

Лилль шаҳрида эса савдо нуқталарида вандализм ҳолатлари қайд этилган. Шаҳар мэри Арно Деланднинг маълум қилишича, шахслар шаҳар марказидаги Apple Store дўконига ҳам бостириб кирган. Ниццада спорт кийимлари дўконлари ва мотоцикллар савдоси билан шуғулланувчи марказ талон-торож қилинган.

Дастлаб мактаблардаги таълим шароитларини яхшилаш талаблари билан бошланган намойишлар кейинчалик ҳукуматга қарши кенг кўламли норозилик ҳаракатига айланган. Намойишчилар асосан яшаш харажатларининг қимматлашиши ва аҳолига тушаётган иқтисодий босимдан норози.