Франция футболи раҳбари Инфантинони яширинча қўллаб-қувватламоқда

Франция футбол федерацияси (ФФФ) президенти Филипп Диалло FIFA раҳбари Жанни Инфантинони яширинча қўллаб-қувватламоқда. У UEFA’нинг FIFA мусобақаларини бойкот қилиш бўйича позициясига амал қилмаслиги мумкин. Бу ҳақда журналист Ромен Молина ўзининг YouTube каналида маълум қилди.

Манбага кўра, Диаллонинг позицияси жорий йилнинг сентябрь ойида Польшада бўлиб ўтадиган 20 ёшгача бўлган аёллар ўртасидаги Жаҳон чемпионати билан боғлиқ. У UEFA’нинг FIFA ҳомийлигидаги мусобақаларни бойкот қилиш позициясига қарамай, Франция терма жамоасининг ушбу турнирда иштирок этишини истамоқда.

Молинанинг таъкидлашича, Франция президенти Эммануэль Макрон ҳам вазиятга аралашган. У футбол конфедерациялари раҳбарларини FIFA ичидаги бўлинишнинг олдини олиш ва бирликни сақлашга чақирган. Хусусан, Макрон Африка футбол конфедерацияси (CAF) президенти Патрис Мотсепе билан музокаралар ўтказган. Жорий йилнинг 6 август куни CAF Инфантинони қўллаб-қувватлашини маълум қилган.

Шунингдек, Европа футбол ассоциациялари Инфантинони қўллаб-қувватлаган хатларини қайтариб олишни режалаштираётгани ҳақида хабар берилди. UEFA’нинг 55 аъзосидан дастлаб 52 таси Инфантино номзодини қўллаб-қувватлаган. Германия, Руминия ва Норвегия уни қўллаб-қувватламаган эди.

Уэльс футбол ассоциацияси Инфантинони қўллаб-қувватлашдан очиқчасига воз кечган биринчи ташкилот бўлди. Кейинчалик Сербия ва Швеция каби бир қатор давлатлар ҳам унга бўлган қўлловини қайтариб олди.

Шу тариқа, FIFA раҳбари атрофидаги зиддиятлар кучайиб бораётган бир пайтда Франция футбол федерацияси раҳбари Филипп Диаллонинг Инфантинони қўллаб-қувватлаётгани ҳақидаги хабарлар Европа футболидаги бўлинишни янада кучайтириши мумкин.