Fransiya futboli rahbari Infantinoni yashirincha qo‘llab-quvvatlamoqda

Fransiya futbol federatsiyasi (FFF) prezidenti Filipp Diallo FIFA rahbari Janni Infantinoni yashirincha qo‘llab-quvvatlamoqda. U UEFA’ning FIFA musobaqalarini boykot qilish bo‘yicha pozitsiyasiga amal qilmasligi mumkin. Bu haqda jurnalist Romen Molina o‘zining YouTube kanalida ma’lum qildi.

Manbaga ko‘ra, Dialloning pozitsiyasi joriy yilning sentyabr oyida Polshada bo‘lib o‘tadigan 20 yoshgacha bo‘lgan ayollar o‘rtasidagi Jahon chempionati bilan bog‘liq. U UEFA’ning FIFA homiyligidagi musobaqalarni boykot qilish pozitsiyasiga qaramay, Fransiya terma jamoasining ushbu turnirda ishtirok etishini istamoqda.

Molinaning ta’kidlashicha, Fransiya prezidenti Emmanuel Makron ham vaziyatga aralashgan. U futbol konfederatsiyalari rahbarlarini FIFA ichidagi bo‘linishning oldini olish va birlikni saqlashga chaqirgan. Xususan, Makron Afrika futbol konfederatsiyasi (CAF) prezidenti Patris Motsepe bilan muzokaralar o‘tkazgan. Joriy yilning 6 avgust kuni CAF Infantinoni qo‘llab-quvvatlashini ma’lum qilgan.

Shuningdek, Yevropa futbol assotsiatsiyalari Infantinoni qo‘llab-quvvatlagan xatlarini qaytarib olishni rejalashtirayotgani haqida xabar berildi. UEFA’ning 55 a’zosidan dastlab 52 tasi Infantino nomzodini qo‘llab-quvvatlagan. Germaniya, Ruminiya va Norvegiya uni qo‘llab-quvvatlamagan edi.

Uels futbol assotsiatsiyasi Infantinoni qo‘llab-quvvatlashdan ochiqchasiga voz kechgan birinchi tashkilot bo‘ldi. Keyinchalik Serbiya va Shvetsiya kabi bir qator davlatlar ham unga bo‘lgan qo‘llovini qaytarib oldi.

Shu tariqa, FIFA rahbari atrofidagi ziddiyatlar kuchayib borayotgan bir paytda Fransiya futbol federatsiyasi rahbari Filipp Dialloning Infantinoni qo‘llab-quvvatlayotgani haqidagi xabarlar Yevropa futbolidagi bo‘linishni yanada kuchaytirishi mumkin.