Эронга қарши уруш АҚШга қанчага тушяпти?

АҚШнинг Эронга қарши уруш учун сарфлаган маблағи 47 миллиард доллардан ошди. Бу июль ойида берилган ҳисоб-китобдан 25 фоизга кўпроқдир. Бу ҳақда Пентагон маълумотларига таяниб “Reuters” хабар берди.

“Reuters” қўлга киритган Пентагон маълумотларига кўра, урушда ишлатилган ўқ-дориларни қайта тўлдириш учун 29 миллиард доллардан ортиқ маблағ керак бўлади. Йўқотилган ҳарбий техника ва бошқа воситалар ўрнини тўлдириш учун эса Конгрессдан яна 6 миллиард доллардан кўпроқ маблағ ажратилиши талаб этилади. Бунга уруш давомида йўқотилган самолётлар ва кўплаб дронлар ҳам киради.

Пентагоннинг янги ҳисоб-китоби ҳозирча оммага эълон қилинмаган. АҚШ Мудофаа вазирлиги “Reuters” агентлигининг изоҳ сўровига жавоб бермаган.

Уруш харажатларининг ошиши АҚШда жорий йилнинг 3 ноябрь куни бўлиб ўтадиган Конгресс сайловлари арафасида Республикачилар партияси учун муаммоларни кучайтирмоқда. Можаро сабаб дунёда энергия нархларининг ошиши республикачилар номзодларини қўллаб-қувватлаш даражасига салбий таъсир кўрсатган. Шунингдек, бу ҳолат Президент Дональд Трампнинг рейтингига ҳам зарар етказган.

АҚШ ва Исроил февраль ойида Эронга қарши уруш бошлаган эди. Ўшанда Трамп можаро қисқа вақт давом этишини айтган. Дастлаб АҚШ ҳарбийлари Эрон мудофаа тизимларини йўқ қилиш учун қиммат ва юқори аниқликдаги ракеталардан фойдаланган. Кейинги босқичда эса нисбатан арзонроқ бомбалардан фойдаланиш режалаштирилган.

Эслатиб ўтамиз, АҚШ Мудофаа вазири Пит Ҳегсет июль ойида уруш харажатларини 37,5 миллиард долларга баҳолаган эди.