Эрон АҚШ объектларига зарба бериш учун янги нишонларни эълон қилди

Эрон АҚШ томонидан ҳужумлар қайта бошланган тақдирда, янги қуролларни қўллаган ҳолда илгари зарба берилмаган Америка объектларига ҳужум қилади. Бу ҳақда Ислом инқилоби қўриқчилари корпуси (ИИҚК) вакили Ҳусайн Моҳебий маълум қилди.

“Бизнинг нишонларимиз ҳам энди аввалгидек бўлмайди. Бизда ҳали зарба берилмаган янги нишонлар бор”, дейди Моҳебий.

Унинг сўзларига кўра, ўзгаришлар уруш географиясига, қўлланилаётган қурол ва ҳарбий техникага дахлдор бўлади. 

“Биз жанговар майдонга янги имкониятларга эга янги қуролларни олиб чиқамиз ва дунё ҳайратда қолади”, дейди ИИҚК вакили.

Қайд этиш жоиз, кеча, 19 сентябрь куни АҚШ Президенти Дональд Трамп Эрон атрофидаги вазият бўйича қарор қабул қилиш жараёнида эканини ва яқин келажакда “анча жиддий воқеалар” кутилаётганини маълум қилган. Бироқ Трампнинг Эрон билан низонинг эҳтимолий ривожланиши ҳақидаги баёнотлари сўнгги ҳафталарда бир неча бор ўзгарди. Хусусан, 18 сентябрь куни АҚШ Президенти Вашингтон низонинг бурилиш нуқтасига келганини айтган. Трампнинг сўзларига кўра, у Эронга “бостириб кириш ва йўқ қилиш” ёки қилмаслик масаласини ечиши керак.

Эслатиб ўтамиз, аввалроқ Эрон Қатар орқали АҚШга урушни тўхтатиш бўйича ўз шартларини юборгани ҳақида хабар берилган эди. Теҳрон барча фронтларда жанговар ҳаракатларни тўхтатиш, музлатилган маблағларни блокдан чиқариш ва денгиз блокадасини бекор қилишни талаб қилмоқда.