Эрон АҚШга урушни тўхтатиш бўйича таклиф юборди

Эрон Қатар орқали АҚШга урушни тўхтатиш бўйича ўз шартларини юборди. Теҳрон барча фронтларда жанговар ҳаракатларни тўхтатиш, музлатилган маблағларни блокдан чиқариш ва денгиз блокадасини бекор қилишни талаб қилмоқда. Бу ҳақда Эрон Миллий хавфсизлик олий кенгаши котиби Муҳсин Ризоий “Al Jazeera” телеканалига маълум қилди.

“Биз Қатар воситачиси билан алоқадамиз. У Вашингтонга урушни тўхтатиш бўйича шартларимизни етказди. Энди бу масала юзасидан Президент Трампнинг жавобини кутяпмиз”, деган Ризоий.

Унинг сўзларига кўра, Эроннинг таклифида урушни барча фронтларда тўхтатиш, музлатиб қўйилган молиявий маблағларни блокдан чиқариш ҳамда денгиз блокадасини олиб ташлаш каби талаблар бор.

Ризоий, шунингдек, АҚШ ва Исроилнинг ҳаракатлари Эронга Ядро қуролини тарқатмаслик тўғрисидаги шартномадан чиқиш учун асос бераётганини айтган. Шу билан бирга, у Теҳрон марҳум олий раҳбар томонидан чиқарилган ядро қуролидан фойдаланишни тақиқловчи фатвога содиқ қолаётганини ва Эроннинг ядровий доктринаси ўзгармаганини таъкидлаган.

Маълумот учун, июнь ўрталарида АҚШ ва Эрон тинчлик келишувини тузиш жараёнини бошлашга қаратилган меморандумни имзолаган эди. Бироқ 3 ҳафта ўтиб, вазият яна кескинлашган. Вашингтон Теҳронни Ҳормуз бўғозида тижорий кемаларга ҳужум қилишда айблаганидан сўнг, томонлар ўртасида зарбалар алмашинуви қайта бошланган.

Эслатиб ўтамиз, аввалроқ АҚШ Президенти Дональд Трамп Вашингтон Эрон билан урушда туб бурилиш босқичига яқинлашаётганини айтиб, бу борада тез орада муҳим қарорни эълон қилиш ниятида эканини маълум қилган эди.