Эрон ҳали “тўғри келишув”га тайёр эмас – Трамп

АҚШ Президенти Дональд Трамп Эрон ҳали Вашингтон билан “тўғри келишув”га эришишга тайёр эмас, деб ҳисоблашини айтди. Бу ҳақда Трамп кеча, 21 август куни журналистлар билан суҳбатда сўз очди.

Маълум қилинишича, АҚШ раҳбаридан Вашингтоннинг Эронга қарши ҳарбий имкониятлари чекланган ёки чекланмагани сўралганда, у барчасини кузатаётганини ва Эрон тарафи нотўғри ҳаракат қилаётганини билдирган.

“Улар келишув тузишни жуда хоҳлайди, аммо менинг фикримча, ҳали тўғри келишувга тайёр эмас”, деган Трамп.

Унинг таъкидлашича, АҚШ Ҳормуз бўғози билан боғлиқ ҳудуднинг катта қисми устидан тўлиқ назоратга эга.

Маълумот учун, АҚШ ва Исроил Эронга қарши ҳужумларни жорий йилнинг 28 февралида бошлашидан олдин Ҳормуз бўғози орқали жаҳондаги нефть ва суюлтирилган табиий газ таъминотининг қарийб бешдан бир қисми ташилган. Уруш олти ойлик муддатга яқинлашар экан, Эроннинг ракета ва дронлар салоҳияти сақланиб қолаётгани сабабли бўғозда энергетика ташувлари билан боғлиқ узилишлар давом этмоқда.

Эрон урушнинг дастлабки ҳужумларига Исроил ва АҚШ ҳарбий базалари жойлашган Форс кўрфази давлатларига зарбалар билан жавоб берган. АҚШ ва Исроилнинг Эронга қарши ҳужумлари ҳамда Исроилнинг Ливандаги зарбалари оқибатида минглаб одамлар ҳалок бўлган, миллионлаб киши эса ўз уйларини тарк этган.

Эслатиб ўтамиз, Вашингтон 20 август куни Эрон раҳбариятини ағдариш мақсадида тарихдаги энг қатъий молиявий санкцияларни жорий этишини маълум қилганди. АҚШ Молия вазири Скотт Бессент режалаштирилаётган санкциялар тафсилотларини 24 август куни эълон қилишини айтган.

Трамп эса аввалроқ Эронга ҳар қандай “ҳаётий ёрдам” кўрсатадиган давлатлар ҳам жиддий иқтисодий оқибатларга дуч келишидан огоҳлантирган эди.